"ஆரம்ப இலக்குகளில் இருந்து விலகிவிட்டது": ஐ.நா தலைமையகத்திலேயே வைத்து ஐ.நா-வைக் கடுமையாகச் சாடிய அர்ஜென்டினா அதிபர்!

ஐக்கிய நாடுகள் சபையின் பொதுச்சபைக் கூட்டத்தொடரில் உரையாற்றிய அர்ஜென்டினா அதிபர் ஹேவியர் மிலே, "ஐக்கிய நாடுகள் சபை ஒரு பயனற்ற அமைப்பாக மாறிவிட்டது" எனக் கடுமையான விமர்சனங்களை முன்வைத்து உலகத் தலைமைகளை அதிர்ச்சிக்குள்ளாக்கியுள்ளார்.

நியூயார்க்கில் உள்ள ஐ.நா தலைமையகத்தில் நடைபெற்ற 79-வது பொதுச்சபைக் கூட்டத்தில் முதன்முறையாகப் பங்கேற்று உரையாற்றிய அதிபர் ஹேவியர் மிலே, ஐ.நா சபை தனது தொடக்கக் கால இலக்குகளில் இருந்து முற்றிலுமாக விலகிச் சென்றுவிட்டதாகக் குற்றஞ்சாட்டினார்

"உலக அமைதியைப் பேணவும், மனித உரிமைகளைப் பாதுகாக்கவும் உருவாக்கப்பட்ட ஐக்கிய நாடுகள் சபை, இன்று நாடுகளின் இறையாண்மையையும் தனிநபர் சுதந்திரத்தையும் கட்டுப்படுத்தும் ஒரு மாபெரும் உலகளாவிய அதிகார மையமாக மாறிவிட்டது. உலகளாவிய பிரச்சினைகளைத் தீர்ப்பதில் இந்த அமைப்பு முற்றிலுமாகத் தோல்வியடைந்து, ஒரு பயனற்ற பொறிமுறையாக உருவெடுத்துள்ளது."

ஐ.நா-வின் "2030 நிலையான வளர்ச்சி இலக்குகள்" திட்டத்தைக் கடுமையாகச் சாடிய அவர், இது சோசலிசக் கருத்துக்களைத் திணிக்கும் ஒரு வடிவம் என்றும், அர்ஜென்டினா இனி இந்தத் திட்டங்களுக்குக்ட்டுப்படாது என்றும் திட்டவட்டமாக அறிவித்தார்.

மேலும், பயங்கரவாதத்திற்கு எதிரான போராட்டம் மற்றும் சர்வதேச மோதல்களைக் கையாள்வதில் ஐ.நா சபை இரட்டை நிலையைப் பின்பற்றுவதாகவும் அவர் சாடினார்.

மேலும் வலதுசாரி மற்றும் தீவிர தாராளமயப் பொருளாதாரக் கொள்கைகளைக் கொண்ட அர்ஜென்டினா அதிபர் ஹேவியர் மிலேயின் இந்த அதிரடி பேச்சு, சர்வதேச அரசியல் அரங்கிலும் ஐ.நா பொதுச்சபையிலும் பெரும் விவாதத்தையும் அதிர்வலைகளையும் ஏற்படுத்தியுள்ளது.