ஒன்டாரியோ ஏரி இனி ‘லேக் அமெரிக்கா’... அதிரடி உத்தரவில் கையெழுத்திட்டார் அதிபர் டிரம்ப்!

அமெரிக்கா மற்றும் கனடா எல்லைப் பகுதியில் அமைந்துள்ள புகழ்பெற்ற 'ஒன்டாரியோ' (Lake Ontario) ஏரியின் பெயரை 'லேக் அமெரிக்கா' (Lake America) என மாற்றுவதற்கான புதிய நிர்வாக உத்தரவில் அமெரிக்க அதிபர் டொனால்ட் டிரம்ப் கையெழுத்திட்டுள்ளார்.

கனடாவுடனான வர்த்தகப் போர் தீவிரமடைந்து வரும் நிலையில், டிரம்பின் இந்த அதிரடி நடவடிக்கை சர்வதேச அளவில் பெரும் அரசியல் அதிர்வலைகளை ஏற்படுத்தியுள்ளது.

அமெரிக்காவின் உள்நாட்டுத் துறை அமைச்சகம் தனது புவியியல் தரவுத்தளத்தில் 'ஒன்டாரியோ ஏரி' என்ற பெயரை உடனடியாக 'லேக் அமெரிக்கா' என மாற்ற வேண்டும் என்று டிரம்ப் பிறப்பித்த உத்தரவில் குறிப்பிடப்பட்டுள்ளது. கனடா அரசுடன் நிலவும் வர்த்தக மோதலின் பின்னணியிலேயே இந்த முடிவு எடுக்கப்பட்டதாகத் தெரிவிக்கப்பட்டுள்ளது.

டிரம்பின் இந்த அறிவிப்புக்குக் கனடா பிரதமர் மார்க் கார்னி கடும் கண்டனம் தெரிவித்துள்ளார். "ஒன்டாரியோ என்ற பெயர் நூற்றாண்டுகள் பழமையான பழங்குடியினரின் பாரம்பரியச் சொல். அமெரிக்கா தனது வரைபடத்தில் பெயர்களை மாற்றிக் கொள்ளலாம்; ஆனால் இந்த ஏரி எப்போதும் ஒன்டாரியோ ஏரியாகவே இருக்கும்" என அவர் பதிலளித்துள்ளார்.

டிரம்பின் இந்த நடவடிக்கைக்குக் கனடா மட்டுமன்றி அமெரிக்க எல்லை மாநிலங்களிலிருந்தும் எதிர்ப்புகள் கிளம்பியுள்ளன. நியூயார்க் மாநில ஆளுநர் கேத்தி ஹோச்சூல், "நியூயார்க் மாநில நிர்வாகம் இந்த ஏரியை 'லேக் அமெரிக்கா' என்று ஒருபோதும் ஏற்றுக்கொள்ளாது" என டிரம்பின் உத்தரவை விமர்சித்துள்ளார்.

ஏற்கனவே 'மெக்சிகோ வளைகுடா'வின் பெயரை 'அமெரிக்க வளைகுடா' என டிரம்ப் மாற்றிய நிலையில், தற்போது ஒன்டாரியோ ஏரியின் பெயரையும் மாற்றியிருப்பது இரு நாடுகளுக்கு இடையிலான ராஜதந்திர உறவில் மேலும் விரிசலை ஏற்படுத்தியுள்ளது.