நேபாள பேரழிவு ஒரு எச்சரிக்கை... சீனா கட்டும் ‘மெடோக்’ அணையால் இந்தியாவிற்கு ‘நீர் வெடிகுண்டு’ ஆபத்து!

திபெத் மற்றும் நேபாள எல்லைப் பகுதியில் ஏற்பட்ட திடீர் பனிச்சரிவு மற்றும் வெள்ளப்பெருக்கு நூற்றுக்கணக்கான உயிர்களைப் பலிவாங்கி பெரும் பேரழிவை ஏற்படுத்தியுள்ளது. ஆனால், இந்த பேரழிவு வெறும் தொடக்கம்தான் என்றும், இதையும் விட மிகப்பெரிய இயற்கை அபாயம் இந்தியாவின் வடகிழக்கு மாநிலங்களை எதிர்நோக்கியுள்ளது என்றும் புவியியல் மற்றும் பாதுகாப்பு நிபுணர்கள் எச்சரிக்கின்றனர்.

சீனா, திபெத்தின் எல்லைப் பகுதியில் பிரம்மபுத்திரா ஆற்றின் குறுக்கே கட்டி வரும் பிரம்மாண்டமான Medog அணைதான் இந்த பெரும் அச்சத்திற்கு முக்கியக் காரணமாக உருவெடுத்துள்ளது.

திபெத்தில் 'யார்லுங் சாங்போ' என்று அழைக்கப்படும் பிரம்மபுத்திரா நதியின் குறுக்கே, சுமார் 167 பில்லியன் டாலர் செலவில் 60,000 மெகாவாட் மின் உற்பத்தி திறன் கொண்ட பிரம்மாண்ட அணையை சீனா கட்டி வருகிறது. இது உலகின் மிகப்பெரிய நீர்மின் திட்டமாகும்.

இந்த அணை அமையவிருக்கும் 'நம்சா பர்வா' பிராந்தியம், மிக அதிக நிலநடுக்க அபாயம் கொண்ட அதிர்வு மண்டலத்தில் (Seismic Zone V) அமைந்துள்ளது.

ஏதேனும் ஒரு பெரிய நிலநடுக்கம் அல்லது பனிச்சரிவால் இந்த அணை உடைந்தால், லட்சக்கணக்கான கன அடி நீர் ஒரே நேரத்தில் வெளியேறும். இதனால் இந்தியாவின் அருணாச்சல பிரதேசம் மற்றும் அசாம் மாநிலங்கள் முழுமையாக நீரில் மூழ்கி அழியும் அபாயம் உள்ளது.

மழைக் காலத்தில் சீனாவிலிருந்து திடீரென நீர் திறந்துவிடப்பட்டால் இந்தியாவில் பெருவெள்ளமும், கோடைக் காலத்தில் தண்ணீரைத் தேக்கி வைத்தால் விவசாயப் பாதிப்பும் ஏற்படும் ஆபத்து நிலவுகிறது.

நேபாளத்தில் ஏற்பட்ட பனிச்சரிவு வெள்ளம், இமயமலைப் பிராந்தியத்தின் இயற்கைச் சூழல் எந்த அளவுக்கு மென்மையானது என்பதை உலகுக்கு உணர்த்தியுள்ளது. இமயமலைப் பகுதியில் சீனா அமைத்து வரும் இந்த அணை, வெறும் மின்சாரத் திட்டம் அல்ல; அது இந்தியாவுக்கு எதிரான ஒரு 'நீர் வெடிகுண்டு' என நிபுணர்கள் சுட்டிக்காட்டுகின்றனர்.

இதனை எதிர்கொள்ள இந்திய அரசும் பிரம்மபுத்திரா நதியின் குறுக்கே தடுப்புத் திட்டங்களை திட்டமிட்டு வந்தாலும், எல்லை தாண்டிய நதிகள் குறித்து சர்வதேச அளவிலான தீவிர கண்காணிப்பு உடனடித் தேவையாக மாறியுள்ளது.