ரசிகர்களை இழக்கும் பாகிஸ்தான் அணி: ரமீஸ் ராஜா கடும் அதிருப்தி!

டெஸ்ட் கிரிக்கெட்டில் தொடர் தோல்விகளைச் சந்தித்து வரும் பாகிஸ்தான் அணி, தனது கிரிக்கெட் அடையாளத்தையும் ரசிகர்களின் ஆதரவையும் இழந்து வருவதாக அந்த அணியின் முன்னாள் கேப்டனும், முன்னாள் PCB தலைவருமான ரமீஸ் ராஜா கடும் எச்சரிக்கை விடுத்துள்ளார்.  

சமீபத்தில் நடைபெற்ற போட்டிகளில் பாகிஸ்தான் அணி அடைந்த படுதோல்வி கிரிக்கெட் வட்டாரத்தில் பெரும் அதிர்ச்சியை ஏற்படுத்தியுள்ளது. இது குறித்து ஊடகங்களுக்கு அளித்த பேட்டியில் ரமீஸ் ராஜா பாகிஸ்தான் கிரிக்கெட்டின் தற்போதைய அவல நிலை குறித்து தனது ஆதங்கத்தை வெளிப்படுத்தியுள்ளார்.  

"ஒரு சர்வதேச அணிக்கு ரசிகர்கள்தான் மிகப்பெரிய தூணாகத் திகழ்கிறார்கள். ஆனால், பாகிஸ்தான் அணியின் தொடர்ச்சியான மோசமான செயல்பாடுகளால் அந்த முதல் தூண் இப்போது சரிந்துவிட்டது. ரசிகர்கள் கடும் ஏமாற்றமடைந்து அணியை விட்டு விலகி வருகிறார்கள். விளையாடிய கடைசி 20 டெஸ்ட் போட்டிகளில் 17-ல் தோல்வியடைந்த ஒரு அணிக்கு ரசிகர்கள் எப்படி தொடர்ந்து ஆதரவு அளிப்பார்கள்?" என்று ரமீஸ் ராஜா கேள்வி எழுப்பியுள்ளார். 

பாகிஸ்தான் அணியின் ஆட்ட உத்திகளைக் கடுமையாகச் சாடிய அவர்,"பாகிஸ்தான் கிரிக்கெட்டின் பாரம்பரிய அடையாளமே அதன் அதிரடி வேகப்பந்து வீச்சுதான். ஆனால், தற்போதைய நிர்வாகமும் வீரர்களும் வேகப்பந்து வீச்சை முற்றிலும் புறக்கணித்துவிட்டு, ஒருதலைப்பட்சமான ஆட்டத்தையே வெளிப்படுத்துகிறார்கள். நமது சொந்த அடையாளத்தையே நாம் அழித்துவிட்டால், டெஸ்ட் கிரிக்கெட் விளையாடுவதில் என்ன பயன்?" எனக் கூறினார். 

மேலும், பல வீரர்கள் சர்வதேச டெஸ்ட் போட்டிகளில் கவனம் செலுத்துவதை விட்டுவிட்டு, டி20 லீக் போட்டிகளில் மட்டுமே அதிக ஆர்வம் காட்டி வருவதாக அவர் குற்றம் சாட்டினார். 

அணி உடனடியாக தனது தவறுகளை உணர்ந்து, போராட்ட குணத்தையும் சிறப்பான ஆட்டத்தையும் வெளிப்படுத்தாவிட்டால், எஞ்சியிருக்கும் ரசிகர்களின் ஆதரவையும் முழுமையாக இழக்க நேரிடும் என ரமீஸ் ராஜா எச்சரித்துள்ளார்