பெற்றோரின் அலட்சியம்: உலகின் உயரமான மவுண்ட் புஜியில் 7 வயது மகனைத் தவிக்கவிட்ட தந்தை.

ஜப்பான் நாட்டின் உலகப் புகழ்பெற்ற Mount Fuji மலையில், 7 வயது சிறுவனைப் பாதியிலேயே தனியாகத் தவிக்கவிட்டுச் சென்றுள்ளார் அவரது தந்தை.  

ஜப்பானின் நகாயா பகுதியைச் சேர்ந்த 48 வயது நபர் ஒருவர், தனது இரு மகன்கள் மற்றும் நண்பருடன் சேர்ந்து நாட்டின் மிக உயரமான Mount Fuji மலையில் ஏறியுள்ளார். இவர்கள் Fujinomiya மலைப்பாதை வழியாகச் சென்று கொண்டிருந்தனர். 

மலையின் 6-வது முகாம் பகுதியில் (சுமார் 8,000 அடிக்கும் அதிகமான உயரத்தில்) சென்று கொண்டிருந்தபோது, 7 வயதான இளைய மகன் தனக்கு மிகவும் சோர்வாக இருப்பதாகவும், மேலே ஏற முடியவில்லை என்றும் கூறியுள்ளான்.  

பயணத்தைப் பாதியில் நிறுத்த விரும்பாத தந்தை, சிறுவனை அங்கே இருந்த ஒரு பெஞ்சில் உட்காருமாறு கூறிவிட்டு, மூத்த மகனுடனும் நண்பருடனும் சேர்ந்து மலை உச்சியை நோக்கிப் பயணத்தைத் தொடர்ந்துள்ளார்.

தந்தை சென்ற சிறிது நேரத்திலேயே அப்பகுதியில் அடர்ந்த பனிமூட்டத்துடன் கூடிய பலத்த மழை பெய்யத் தொடங்கியுள்ளது. கடும் குளிரிலும் மழையிலும் அந்த சிறுவன் தனியாக அமர்ந்திருப்பதை, அங்கிருந்த மலைக்குடில் ஊழியர் ஒருவர் கண்டு அதிர்ச்சியடைந்தார்.  

உடனடியாகச் சிறுவனை மீட்டு பாதுகாப்பு அறைக்குள் அழைத்துச் சென்ற ஊழியர், உள்ளூர் காவல்துறையினருக்குத் தகவல் தெரிவித்தார். காவல்துறை நடவடிக்கை:உடனடியாகச் செயல்பட்ட காவல்துறை அதிகாரிகள், மலையின் 8-வது முகாம் பகுதியில் ஏறிக்கொண்டிருந்த தந்தையைத் தொடர்பு கொண்டு எச்சரித்தனர். 

பனிமலையில் குழந்தைகளைத் தனியாக விட்டுச்செல்வது உயிருக்கே ஆபத்தானது என்பதை எடுத்துக்கூறி, அவரைத் உடனடியாகக் கீழே வரவழைத்துச் சிறுவனை அவரிடம் ஒப்படைத்தனர். அதிகாரிகளிடம் மன்னிப்புக்கேட்ட தந்தை, "நான் அவசரப்பட்டு மிகத் தவறான முடிவை எடுத்துவிட்டேன், இதற்காக மிகவும் வருந்துகிறேன்" என்று தெரிவித்துள்ளார்.  

போலீசாரின் எச்சரிக்கை:மலைப்பயணங்களில் ஈடுபடுபவர்கள் தங்களது குழுவில் உள்ள அனைவரின் உடல்நிலையையும் கருத்தில் கொண்டே பயணிக்க வேண்டும் என்றும், ஒருவருக்குச் சோர்வு ஏற்பட்டால் பயண வேகத்தைக் குறைக்க வேண்டும் அல்லது பயணத்தை முழுமையாக ரத்து செய்ய வேண்டும் என்றும் அதிகாரிகள் கடுமையான எச்சரிக்கை விடுத்துள்ளனர்.  

தக்க சமயத்தில் மலைக்குடில் ஊழியர் சிறுவனைக் கண்டதால் பெரும் ஆபத்து தவிர்க்கப்பட்டுள்ளது. இச்சம்பவம் தற்போது ஜப்பானில் பெரும் பரபரப்பை ஏற்படுத்தியுள்ளது.