பிரபல பாடகர் சுட்டுக்கொலை: கொலையாளிகளைக் கைது செய்யக் கோரி பொதுமக்கள் வீதி மறியல்!

பிரபல ஹரியான்வி பாடகரும் யூடியூபருமான அங்கித் பால்யான், உத்தரப் பிரதேச மாநிலம் ஷாம்லி மாவட்டத்தில் மர்ம நபர்களால் சுட்டுக்கொல்லப்பட்ட சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது.

உடற்பயிற்சிக்கூடத்திலிருந்து வெளியேறித் தனது வாகனத்தை நோக்கிச் சென்றபோது, அங்கு வந்த மர்ம கும்பல் அவர் மீது சரமாரியாகத் துப்பாக்கிச் சூடு நடத்திவிட்டுத் தப்பிச் சென்றது.

சுமார் 18 ரவுண்டுகள் வரை சுடப்பட்டதில், தலை மற்றும் வயிற்றுப் பகுதியில் பலத்த காயமடைந்த அங்கித் பால்யான் மருத்துவமனைக்குக் கொண்டு செல்லும் வழியிலேயே உயிரிழந்தார்.

இக்கொலைச் சம்பவம் குறித்துச் சிறப்புப் படைகள் அமைக்கப்பட்டு, அப்பகுதியில் உள்ள சிசிடிவி கேமரா காட்சிகளை ஆய்வு செய்து கொலையாளிகளைத் தீவிரமாகத் தேடி வருகின்றனர்.

இக்கொலையைக் கண்டித்தும், குற்றவாளிகளை உடனடியாகக் கைது செய்யக் கோரியும் அங்கித்தின் குடும்பத்தினரும் ஆதரவாளர்களும் சாலையில் அமர்ந்து போராட்டத்தில் ஈடுபட்டதால் அப்பகுதியில் பெரும் பரபரப்பு நிலவுகிறது.