சென்னை வரும் பிரதமர் மோடி! அக்டோபர் 11-இல் பிரம்மாண்டமாக திறக்கப்படும் 'இசைஞானி இளையராஜா இசை ஆராய்ச்சி மையம்!

சென்னை மெட்ரோ ரயிலின் இரண்டாம் கட்ட திட்டத்தின் கீழ் பூந்தமல்லி - வடபழனி இடையிலான வழித்தடத் தொடக்க விழா உள்ளிட்ட பல்வேறு அரசு நிகழ்ச்சிகளில் பங்கேற்பதற்காகப் பிரதமர் நரேந்திர மோடி வரும் அக்டோபர் 11-ஆம் தேதி சென்னை வருகிறார்.

இந்தச் சிறப்புப் பயணத்தின்போது, சென்னை ஐஐடி வளாகத்திற்கு வருகை தரும் பிரதமர், அங்குள்ள ஜலகண்டேஸ்வரர் கோயிலில் தரிசனம் செய்த பின், ஐஐடி வளாகத்தில் கட்டப்பட்டுள்ள 'இளையராஜா இசை ஆராய்ச்சி மையத்தை' நாட்டிற்கு அர்ப்பணிக்கவுள்ளார்.

சென்னை ஐஐடி மற்றும் இசையமைப்பாளர் இளையராஜாவின் இசை நிறுவனம் இணைந்து இந்த ஆராய்ச்சி மையத்தை உருவாக்குவதற்கான அடிக்கல்லை கடந்த 2024-ஆம் ஆண்டு நாட்டின.

சுமார் இரண்டு ஆண்டுகளில் கட்டப்பட்டுத் தயார்நிலைக்கு வந்துள்ள இந்த மையம், அறிவியல் தொழில் நுட்பத்தையும் இசையையும் இணைக்கும் ஒரு சர்வதேச மையமாகச் செயல்படும்.

 "இந்த ஆராய்ச்சி மையத்தின் மூலம் எதிர்காலத்தில் 200 புதிய இளையராஜாக்கள் உருவாக்கப்படுவார்கள்" என்று இசைஞானி இளையராஜா நம்பிக்கை தெரிவித்துள்ளார்.

மையத்தின் முக்கிய நோக்கம் மற்றும் செயல்பாடுகள்

இசை கற்றல், ஒலிப்பதிவுத் தொழில்நுட்பங்கள், இசையியல் ஆய்வுகள் மற்றும் செயற்கை நுண்ணறிவு மூலம் இசையை மேம்படுத்துதல் போன்ற அதிநவீன ஆய்வுகளுக்கான முதன்மைத் தளமாக இந்த மையம் திகழும் எனச் சென்னை ஐஐடி இயக்குநர் தெரிவித்துள்ளார்.

இசையுலகின் வரலாற்று மைல்கல்லாகப் பார்க்கப்படும் இந்த நிகழ்வு, இந்திய அளவில் பெரும் எதிர்பார்ப்பையும் கலை உலகினரிடையே மகிழ்ச்சியையும் ஏற்படுத்தியுள்ளது.