சுவீடனில் ஆட்சி மாற்றம்: 50% வாக்குகளுக்கு மேல் பெற்று வெற்றிப் பாதையில் மக்டலேனா ஆண்டர்சன்!

தற்போதைய பிரதமர் உல்ஃப் கிறிஸ்டர்சன் தலைமையிலான வலதுசாரி கூட்டணியைத் தோற்கடித்து, சோஷியல் டெமாக்ரடிக் கட்சி மீண்டும் ஆட்சியைப் பிடிக்கும் நிலையில் உள்ளது. 

தொலைக்காட்சி ஊடகங்களின் கருத்துக் கணிப்புகள் மற்றும் வாக்கு எண்ணிக்கை தரவுகளின்படி, மக்டலேனா ஆண்டர்சனின் மத்திய-இடதுசாரிக் கூட்டணி 51.3% வாக்குகளைப் பெற்றுப் பெரும்பான்மை பலத்தை எட்டியுள்ளது.

தற்போதைய ஆளும் வலதுசாரி கூட்டணி 46.8% - 47% வாக்குகளை மட்டுமே பெற்று பின்னடைவைச் சந்தித்துள்ளது.  

முடிவுகள் குறித்துப் பேசிய மக்டலேனா ஆண்டர்சன், "சுவீடனில் மாற்றத்திற்கான நேரம் வந்துவிட்டது; நாட்டின் எதிர்காலப் பொறுப்பை ஏற்க சோஷியல் டெமாக்ரடிக் கட்சி தயாராக உள்ளது" எனத் தொண்டர்கள் மத்தியில் உரையாற்றினார்.  

பணவீக்கம், நாட்டின் பொருளாதாரம், பாதுகாப்பு மற்றும் நலத்திட்டங்கள் தொடர்பான வாக்குறுதிகளே மத்திய-இடதுசாரி கூட்டணியின் இந்த வெற்றிக்கு முக்கியக் காரணமாகப் பார்க்கப்படுகிறது.  

முழுமையான மற்றும் இறுதி வாக்கு எண்ணிக்கை முடிவுகள் விரைவில் அதிகாரப்பூர்வமாக அறிவிக்கப்படவுள்ள நிலையில், சுவீடனின் புதிய பிரதமராக மக்டலேனா ஆண்டர்சன் மீண்டும் பொறுப்பேற்பார் என எதிர்பார்க்கப்படுகிறது.