சுவிட்சர்லாந்திலிருந்து இத்தாலிக்கு அகதிகளைத் திருப்பி அனுப்பும் பணி மீண்டும் ஆரம்பம் !

சுவிட்சர்லாந்திலிருந்து இத்தாலிக்கு அகதிகளைத் திருப்பி அனுப்பும் நடவடிக்கை வரும் ஆகஸ்ட் மாத இறுதியிலிருந்து மீண்டும் தொடங்குகிறது. 

சுவிட்சர்லாந்திலிருந்து இத்தாலிக்கு அகதிகளை திருப்பி அனுப்பும் நடைமுறை, வரும் ஆகஸ்ட் மாத இறுதியிலிருந்து கட்டம் கட்டமாக மீண்டும் தொடங்கப்பட உள்ளது.

ஐரோப்பிய ஒன்றியத்தின் 'டப்ளின் ஒப்பந்தத்தின்' (Dublin Regulation) கீழ், ஒரு அகதி ஐரோப்பாவில் எந்த நாட்டிற்குள் முதலில் நுழைகிறாரோ, அந்த நாடுதான் அவரது அகதி கோரிக்கையை பரிசீலிக்க வேண்டும்.

இதன்படி, இத்தாலி வழியாக சுவிட்சர்லாந்து சென்றடைந்த அகதிகளை மீண்டும் இத்தாலிக்கே திருப்பி அனுப்ப சுவிஸ் அரசு திட்டமிட்டுள்ளது. இத்தாலியில் இடநெருக்கடி காரணமாக 2022-ஆம் ஆண்டு டிசம்பர் மாதம் முதல் இந்த இடமாற்றங்களை ஏற்றுக்கொள்வதை இத்தாலி தற்காலிகமாக நிறுத்தி வைத்திருந்தது.

எனினும், ஜூன் 12 முதல் நடைமுறைக்கு வந்துள்ள புதிய ஐரோப்பிய ஒன்றிய அகதிகள் மற்றும் புலம்பெயர்ந்தோர் ஒப்பந்தத்தைத் தொடர்ந்து, இந்நடவடிக்கை மீண்டும் தொடங்கப்படுகிறது.  

முதல் கட்டமாக விமான முன்பதிவுகள் செய்யப்பட்டுள்ளதாகவும், ஆரம்பத்தில் தனிப்பட்ட சில வழக்குகளுக்கு முன்னுரிமை அளிக்கப்பட்டு, படிப்படியாக இந்த இடமாற்ற நடவடிக்கைகள் விரிவுபடுத்தப்படும் என்றும் சுவிட்சர்லாந்தின் புலம்பெயர்வுக்கான மாநில செயலகம் (SEM) தெரிவித்துள்ளது.