வெளிநாட்டு ஊழியர்களுக்குக் கட்டுப்பாடு: சுவிஸ் நாடாளுமன்றக் குழுவின் பரிந்துரை.

சுவிட்சர்லாந்திற்குள் ஐரோப்பிய ஒன்றியப் பணியாளர்கள் நுழைவதைக் கட்டுப்படுத்த புதிய 'குடியேற்ற வரி' விதிக்க சுவிஸ் நாடாளுமன்றக் குழு பரிந்துரைத்துள்ளது. 

சுவிட்சர்லாந்து மற்றும் ஐரோப்பிய ஒன்றியத்திற்கு (EU) இடையேயான இருதரப்பு ஒப்பந்தப் பேச்சுவார்த்தைகளின் ஒரு பகுதியாக, அதிகப்படியான குடியேற்றத்தைக் கட்டுப்படுத்த புதிய 'ஊக்கக் கட்டணம் அல்லது குடியேற்ற வரி' (Immigration Levy) விதிக்கப்பட வேண்டும் என்று சுவிஸ் மாநிலங்களின் கவுன்சில் குழு (Council of States Committee) பரிந்துரைத்துள்ளது. 

ஐரோப்பிய ஒன்றியத்துடனான தடையற்ற மக்கள் நடமாட்ட ஒப்பந்தத்தின் கீழ், சுவிட்சர்லாந்திற்கு வரும் வெளிநாட்டுப் பணியாளர்களின் எண்ணிக்கை கணிசமாக அதிகரிக்கும் பட்சத்தில், இந்த வரி நடைமுறைக்கு வரும் என அறிவிக்கப்பட்டுள்ளது.

 இந்த வரிப் பணத்தை முதலாளிகளிடமிருந்தே பெற வேண்டும் என்றும், குடும்ப மறுஇணைவு திட்டத்தின் கீழ் (Family Reunification) வரும் பெரியவர்களுக்கும் இது பொருந்தும் என்றும் பரிந்துரைக்கப்பட்டுள்ளது. 

உள்நாட்டு மக்களுக்கு வேலைவாய்ப்பில் முன்னுரிமை அளிப்பதை ஊக்குவிக்கவும், குடியேற்றத்தைக் கட்டுப்படுத்தவும் இந்த நடவடிக்கை எடுக்கப்படுவதாகக் குழு தெரிவித்துள்ளது. மேலும், இந்த வரியின் மூலம் கிடைக்கும் வருவாய் சுவிஸ் மக்களுக்குத் திரும்பப் பகிர்ந்தளிக்கப்படும் என்றும் தெரிவிக்கப்பட்டுள்ளது.