லண்டன் திரும்பினாலும் அரசுப் பொறுப்புகள் வழங்கப்படாது: ஹாரி தம்பதி குறித்து பக்கிங்ஹாம் அரண்மனை அறிவிப்பு!

பிரித்தானிய இளவரசர் ஹாரி மற்றும் அவரது மனைவி மேகன் மார்க்கல் ஆகியோர் மீண்டும் பிரிட்டனுக்குத் திரும்பினாலும், அவர்களுக்கு அரச குடும்பத்தின் உத்தியோகபூர்வ பொறுப்புகளோ அல்லது 'அரச குடும்ப மூத்த உறுப்பினர்கள்' என்ற அந்தஸ்தோ வழங்கப்பட மாட்டாது என மன்னர் மூன்றாம் சார்லஸ் தெளிவாக அறிவித்துள்ளார்.

கடந்த 2020-ஆம் ஆண்டு அரச குடும்பப் பொறுப்புகளில் இருந்து விலகிய ஹாரி-மேகன் தம்பதியினர், தற்போது அமெரிக்காவில் வசித்து வருகின்றனர். இந்த நிலையில், இளவரசர் ஹாரி மீண்டும் பிரிட்டன் திரும்ப விரும்பினாலும், அவர்களுக்கான அரச குடும்பப் பணிகளோ அல்லது அரச நிதி உதவிகளோ வழங்கப்படாது என்று பக்கிங்ஹாம் அரண்மனை வட்டாரங்கள் உறுதிப்படுத்தியுள்ளன.

அரச குடும்பத்தின் கௌரவம் மற்றும் நெறிமுறைகளைப் பேணும் வகையில் இந்த முடிவு எடுக்கப்பட்டுள்ளதாகத் தெரிவிக்கப்படுகிறது. அதேவேளையில், ஹாரி அரச குடும்பத்தின் ஒரு அங்கமாக அன்புடன் பார்க்கப்பட்டாலும், உத்தியோகபூர்வ அரசப் பணிகளுக்குத் திரும்புவதற்கான கதவுகள் அடைக்கப்பட்டுவிட்டதாகவே மன்னரின் இந்த நடவடிக்கை காட்டுகிறது.

சமீபகாலமாக அரச குடும்பத்திற்கும் ஹாரிக்கும் இடையே இருந்து வந்த விரிசல் அதிகரித்து வரும் சூழலில், மன்னர் சார்லஸின் இந்தத் தீர்க்கமான அறிவிப்பு சர்வதேச ஊடகங்களில் பெரும் விவாதத்தைக் கிளப்பியுள்ளது.