இணையவழித் தாக்குதல்கள் அதிகரிக்கும் அபாயம் – சுவிஸ் நிறுவனங்கள் கவலை!

வியாழக்கிழமை வெளியிடப்பட்ட SME சைபர் செக்யூரிட்டி 2026 ஆய்வின்படி, கடந்த மூன்று ஆண்டுகளில் சுவிட்சர்லாந்தின் 6 சதவீத சிறு மற்றும் நடுத்தர நிறுவனங்கள் தீவிரமான இணையவழித் தாக்குதல்களைச் சந்தித்துள்ளன. இது சுமார் 35 ஆயிரம் நிறுவனங்களுக்குச் சமமாகும். முந்தைய ஆண்டில் இந்த விகிதம் 4 சதவீதமாக இருந்தது.

மேலும், கணக்கெடுக்கப்பட்ட நிறுவனங்களில் சுமார் 7 சதவீதம், இணையவழி மிரட்டிப் பணம் பறிக்கும் தாக்குதல்களுக்கு ஆளாகியுள்ளதாகத் தெரிவித்துள்ளன. ஃபிஷிங் எனப்படும் போலி இணையச் செய்திகள் மூலம் தகவல்களைத் திருடுதல், கடவுச்சொற்களைத் திருடுதல் மற்றும் தீங்கிழைக்கும் மென்பொருட்கள் மூலம் தாக்குதல் நடத்துதல் ஆகியவை பொதுவான இணையக் குற்றங்களாக உள்ளன.

எதிர்கால அச்சுறுத்தல்கள் குறித்து, ஆய்வில் பங்கேற்ற ஐந்து நிறுவனங்களில் நான்கு நிறுவனங்கள், அதாவது 81 சதவீதம், செயற்கை நுண்ணறிவின் பயன்பாட்டால் இணையவழித் தாக்குதல்கள் மேலும் ஆபத்தானவையாக மாறும் எனக் கருதுகின்றன. இருப்பினும், பாதிக்கும் குறைவான நிறுவனங்களே தற்போது தங்களது பணிகளில் செயற்கை நுண்ணறிவைப் பயன்படுத்துகின்றன.

இந்த ஆய்வு, ஒன்று முதல் 49 பணியாளர்களைக் கொண்ட சுவிஸ் நிறுவனங்களின் 507 நிர்வாக இயக்குநர்களிடம் நடத்தப்பட்டது. மொபிலியார் நிறுவனம், டிஜிட்டல்சுவிட்சர்லாந்து, கூட்டாட்சி இணையப் பாதுகாப்பு அலுவலகம் உள்ளிட்ட அமைப்புகள் இணைந்து இந்த ஆய்வை மேற்கொண்டன.