இரவு குறட்டை... பகல் சர்க்கரை நோய்: மருத்துவ உலகம் தரும் எச்சரிக்கை!

தூக்கத்தின் போது சுவாசப் பாதையில் தற்காலிக அடைப்பு ஏற்பட்டு ஆக்ஸிஜன் அளவு குறைவதை 'அடைப்பு தூக்க மூச்சுத்திணறல்' என்று அழைக்கிறார்கள். 

இந்நிலை ஏற்படும் போது, உடலை ஆபத்திலிருந்து காப்பாற்ற மூளை விழிப்படைந்து 'கார்டிசால்' போன்ற மனஅழுத்த ஹார்மோன்களை அதிகளவில் சுரக்கிறது. 

இந்த ஹார்மோன்கள் கல்லீரலில் இருந்து குளுக்கோஸை ரத்தத்தில் அதிகளவில் சேர்க்க வைப்பதுடன், இன்சுலின் ஹார்மோன் சரியாக வேலை செய்வதையும் தடுக்கின்றன . 

இதன் காரணமாக, நாள்பட்ட உரத்த குறட்டைப் பிரச்சனை உள்ளவர்களுக்கு ரத்தத்தில் சர்க்கரையின் அளவு அதிகரித்து, சர்க்கரை நோய் வருவதற்கான வாய்ப்பு பெருமளவில் உயர்கிறது.

அதேபோல், உடல் பருமன் என்பது குறட்டை மற்றும் சர்க்கரை நோய் ஆகிய இரண்டிற்கும் பொதுவான காரணியாக விளங்குகிறது. கழுத்துப் பகுதியில் கொழுப்புப் படிவுகள் அதிகமாகும் போது சுவாசப் பாதை குறுகி குறட்டை உருவாகிறது; மறுபுறம் அதே உடல் பருமன் இன்சுலின் செயல்பாட்டைப் பாதிக்கிறது.

இரவு முழுவதும் தூங்கினாலும் காலையில் சோர்வு, தலைவலி, பகலில் அதிக கொட்டாவி போன்ற அறிகுறிகள் இருந்தால், அதை வெறும் சோர்வாகக் கருதாமல் ரத்தச் சர்க்கரை அளவு மற்றும் தூக்கப் பரிசோதனையை செய்துகொள்வது அவசியம். 

உடல் எடையைக் குறைப்பது, பக்கவாட்டில் படுத்து உறங்குவது மற்றும் ஆரோக்கியமான உணவு முறையைப் பின்பற்றுவது குறட்டையைக் கட்டுப்படுத்தி சர்க்கரை நோயின் தீவிரத்தில் இருந்து உடலைப் பாதுகாக்க உதவும்.