திட்டமிட்ட குற்றங்களை ஒடுக்க சுவிஸ் அரசு அதிரடி: சந்தேகத்திற்குரிய நடவடிக்கைகளை தெரிவிப்பது இனி கட்டாயம்!

 போதைப்பொருள் கடத்தல், பணமோசடி, மனித கடத்தல் மற்றும் சைபர் குற்றங்களில் ஈடுபடும் கும்பல்கள் சுவிஸ் நாட்டின் பொருளாதாரம் மற்றும் சமூகத்திற்குள் ஊடுருவுவதைத் தடுப்பதே இந்த நடவடிக்கையின் முக்கிய நோக்கமாகும்.

 இந்தப் புதிய சட்டத்தின்படி, உள்ளாட்சி அமைப்புகள், நிலப்பதிவு அலுவலகங்கள் (Land Registry), உணவு ஆய்வுத் துறையினர் மற்றும் சந்தைக் கண்காணிப்பு அதிகாரிகள் தங்கள் ஆய்வின் போது முறைகேடுகளையோ அல்லது சந்தேகத்திற்கிடமான பணப் பரிவர்த்தனைகளையோ கண்டறிந்தால், அதை உடனடியாகச் சட்ட அமலாக்கப் பிரிவுக்குத் தெரிவிக்க வேண்டும். 

சுவிஸ் கூட்டாட்சி காவல் துறை (Fedpol) தலைவர் Eva Wildi-Cortés இது குறித்துப் பேசுகையில், "அரசு ஊழியர்கள் பல குற்ற நடவடிக்கைகளை மிக நெருக்கமாகக் கவனிக்க முடிகிறது, எனவே அவர்களின் தகவல்கள் குற்றக் கும்பல்களை ஒழிக்க மிகவும் அவசியம்" எனத் தெரிவித்துள்ளார்.