2030-க்குள் உணவு வீணாவதைப் பாதியாகக் குறைக்க சுவிஸ் அரசு திட்டம்: நாடு தழுவிய அளவில் சிறப்பு விழிப்புணர்வு!

சுவிட்சர்லாந்தில் ஆண்டுதோறும் நபர் ஒருவருக்குச் சுமார் 80 முதல் 90 கிலோ வரை உண்ணக்கூடிய உணவுப் பொருட்கள் வீணாகக் குப்பையில் வீசப்படுவதாக புள்ளிவிவரங்கள் தெரிவிக்கின்றன.

பண்ணை உற்பத்தியில் தொடங்கி மக்களின் தட்டு வரை, உற்பத்தியாகும் உணவில் மூன்றில் ஒரு பங்கு வீணாகிறது. இதைக் கட்டுப்படுத்த சுவிஸ் அரசு, வணிக நிறுவனங்கள் மற்றும் தன்னார்வத் தொண்டு நிறுவனங்கள் இணைந்து இந்த தேசிய விழிப்புணர்வு வாரத்தை ஒருங்கிணைத்துள்ளன.

 வரும் 2030-ஆம் ஆண்டிற்குள் நாட்டில் வீணாகும் உணவின் அளவைப் பாதியாகக் குறைக்க சுவிஸ் கூட்டாட்சி அரசு இலக்கு நிர்ணயித்துள்ளது. இந்த விழிப்புணர்வு வாரத்தில், உணவைச் சரியாகச் சேமித்து வைப்பது, எஞ்சிய உணவுகளை வீணாக்காமல் மீண்டும் பயன்படுத்துவது மற்றும் தேவைக்கேற்ப மட்டும் பொருட்களை வாங்குவது போன்ற எளிய நடைமுறைகள் குறித்து மக்களுக்குப் பயிற்சிகளும் ஆலோசனைகளும் வழங்கப்படவுள்ளன.

உணவை வீணாக்குவது பொருளாதார இழப்பு மட்டுமின்றி, தீவிரமான பருவநிலை மாற்றத்திற்கும் வழிவகுக்கும் என்பதால், பொதுமக்கள் அனைவரும் இந்த முயற்சியில் தீவிரமாகப் பங்கேற்குமாறு அதிகாரிகள் கேட்டுக்கொண்டுள்ளனர்.