சுவிட்சர்லாந்தில் உச்சம் தொடும் வெப்ப அலை!

சுவிற்சர்லாந்தில் வெப்ப அலையின் தாக்கம் வார இறுதியில் உச்சத்தை எட்டும் என எதிர்பார்க்கப்படுகிறது. குறிப்பாக ஜெனீவாவில் வெள்ளிக்கிழமை ( ஆகஸ்ட் 14) வெப்பநிலை 36°C வரை உயரக்கூடும் என வானிலை ஆய்வு அமைப்பான MétéoSuisse முன்னறிவித்துள்ளது.

கடும் வெப்பத்துடன் நாட்டின் பல பகுதிகளில் காட்டுத்தீ ஏற்படும் அபாயமும் அதிகரித்துள்ளது. பெரும்பாலான பகுதிகளில் தீ அபாயம் 4 அல்லது 5-ஆம் நிலைக்கு உயர்ந்துள்ளதால், மிகவும் அதிக எச்சரிக்கை தேவைப்படுவதாக அதிகாரிகள் தெரிவித்துள்ளனர்.

இதனிடையே, மேற்கு ஐரோப்பாவில் இதுவரை பதிவானவற்றில் மிக அதிக வெப்பமான கோடைக்கால தொடக்கம் இந்த ஆண்டு பதிவாகியுள்ளதாக வானிலை ஆய்வு மையம் தெரிவித்துள்ளது. மே மாதத்துக்குப் பிறகு இப்பகுதி எதிர்கொள்ளும் நான்காவது தீவிர வெப்ப அலை இதுவாகும்.

கடும் வெப்பத்தின் போது பொதுமக்கள் பகல் நேரத்தின் அதிக வெப்பம் நிலவும் நேரங்களில் தேவையற்ற வெளிப்புற நடவடிக்கைகளைத் தவிர்க்கவும், அதிகளவு தண்ணீர் அருந்தவும் அறிவுறுத்தப்பட்டுள்ளனர். தலைசுற்றல், அதிக வியர்வை, உடல் சோர்வு உள்ளிட்ட வெப்ப அழுத்தத்தின் அறிகுறிகள் தென்பட்டால் உடனடியாக கவனம் செலுத்துமாறும் அறிவுறுத்தப்பட்டுள்ளது.