உக்ரைன் மடாலயத்தைப் புதுப்பிக்க சுவிட்சர்லாந்து நிதி உதவி!

உக்ரைன் தலைநகர் கீவ்வில் அமைந்துள்ள புகழ்பெற்ற 'கீவ்-பெசெர்ஸ்க் லாவ்ரா' (Kyiv-Pechersk Lavra) மடாலயத்தின் அவசரப் பாதுகாப்பு மற்றும் சீரமைப்புப் பணிகளுக்காக சுவிட்சர்லாந்து அரசு 6,00,000 சுவிஸ் பிராங் (சுமார் 7,30,000 அமெரிக்க டாலர்) நிதியை ஒதுக்கியுள்ளது. 

யுனெஸ்கோவால் உலகப் பாரம்பரியச் சின்னமாக அறிவிக்கப்பட்டுள்ள இந்த 11-ஆம் நூற்றாண்டு வரலாற்றுத் தளம், கடந்த ஜூன் மாதம் நடந்த வான்வழித் தாக்குதலில் சேதமடைந்தது. 

இந்த மடாலயத்தின் 975-வது ஆண்டு நிறைவு விழாவில் பங்கேற்ற சுவிட்சர்லாந்து பிரதிநிதிகள், யுனெஸ்கோ அமைப்பு மூலம் இந்த நிதி வழங்கப்பட்டு சீரமைப்புப் பணிகள் தீவிரமாக மேற்கொள்ளப்படும் என்று அதிகாரப்பூர்வமாக அறிவித்துள்ளனர்.