இலங்கையில் தமிழக மீனவர்களின் படகுகள் உடைக்கப்படுவதாக புகார்: அன்புமணி ராமதாஸ் கடும் கண்டனம்!

இந்தியக் கடற்பரப்பில் தொழில் செய்யும் தமிழக மீனவர்களை இலங்கை கடற்படையினர் தொடர்ச்சியாகக் கைது செய்வதும், அவர்களின் வாழ்வாதாரமான படகுகளைப் பறிமுதல் செய்வதும் வாடிக்கையாகிவிட்டது. அவ்வாறு பறிமுதல் செய்யப்படும் படகுகளை இலங்கை அரசு மீண்டும் ஒப்படைக்காமல், கடற்கரைகளிலேயே போட்டு முடக்கி வைத்திருப்பதால் அவை சேதமடைந்து உடைந்து வருகின்றன.

தமிழ்நாட்டைச் சேர்ந்த ஏழை மீனவர்களின் பல லட்சம் ரூபாய் மதிப்பிலான படகுகள் இலங்கை கடலோரப் பகுதிகளில் முறையான பராமரிப்பின்றி உடைந்து நாசமாவதை ஏற்க முடியாது. இது மீனவர்களின் பொருளாதார முதுகெலும்பை உடைக்கும் செயல்.

இலங்கைச் சிறைகளில் உள்ள அனைத்துத் தமிழக மீனவர்களையும், பறிமுதல் செய்யப்பட்ட படகுகளையும் உடனடியாக மீட்க இந்திய வெளியுறவுத்துறை அமைச்சகம் தூதரக ரீதியிலான அழுத்தமான நடவடிக்கைகளை எடுக்க வேண்டும்.

சேதமடைந்த படகுகளுக்கு இலங்கை அரசிடமிருந்து உரிய நஷ்டஈட்டைப் பெற்றுத் தர மத்திய அரசு முன்வர வேண்டும்.

மீனவர் பிரச்சினையில் மத்திய அரசு இனிமேலும் தாமதிக்காமல் நிரந்தரத் தீர்வு காண இலங்கை அரசுடன் உயர்மட்டப் பேச்சுவார்த்தை நடத்த வேண்டும் என்றும் அவர் வலியுறுத்தியுள்ளார்.