கடற்பகுதியில் பதற்றம்: 2 வணிகக் கப்பல்களைக் கடத்திய கடற்கொள்ளையர்கள்!

ஏமன் மற்றும் சோமாலியா கடற்பகுதிகளில் 22 இந்திய மாலுமிகள் பயணம் செய்த 2 வணிகக் கப்பல்களை ஆயுதமேந்திய கடற்கொள்ளையர்கள் அடுத்தடுத்து கடத்தியுள்ள சம்பவம் சர்வதேச அளவில் பெரும் அதிர்ச்சியையும் பரபரப்பையும் ஏற்படுத்தியுள்ளது.

ஏடன் வளைகுடாவில் ஏமன் நாட்டுக் கரையில் இருந்து சுமார் 30 நாட்டிகல் மைல் தொலைவில் சென்று கொண்டிருந்த 'எம்.டி. சிபு 1' (M.T. Sibu 1) என்ற கச்சா எண்ணெய் தாங்கிச் சென்ற கப்பலை 6 ஆயுதமேந்திய கடற்கொள்ளையர்கள் சுற்றி வளைத்துக் கடத்தினர். இந்த கப்பலில் இருந்த 20 பணியாளர்களில் 16 பேர் இந்தியர்கள் ஆவர்.

சோமாலியாவின் புன்ட்லேண்ட் (Puntland) கடற்கரை பகுதியில் சென்று கொண்டிருந்த 'எம்.வி. லுடுஃப்' (M/V LUTUF) என்ற சரக்குக் கப்பலை AK-47 துப்பாக்கிகளுடன் வந்த 8 கடற்கொள்ளையர்கள் கடத்தினர். இதில் பயணித்த 10 பணியாளர்களில் 6 பேர் இந்தியர்கள் ஆவர்.

கடத்தப்பட்ட இரண்டு கப்பல்களிலும் சேர்த்து மொத்தம் 22 இந்திய மாலுமிகள் உள்ளனர். கப்பல் போக்குவரத்து அமைச்சக மூத்த அதிகாரி மற்றும் சர்வதேச கடல்சார் அமைப்புகள் அளித்த முதற்கட்ட தகவலின்படி, இந்திய மாலுமிகள் அனைவரும் தற்சமயம் பாதுகாப்பாக உள்ளனர் எனத் தெரிவிக்கப்பட்டுள்ளது. இருப்பினும், கப்பல்கள் முழுமையாகக் கடற்கொள்ளையர்களின் கட்டுப்பாட்டில் உள்ளதால், அவர்களின் நிலை குறித்த கவலையும் பதற்றமும் நீடிக்கிறது.

இச்சம்பவம் குறித்துத் தகவல் அறிந்ததும், இந்திய கப்பல் போக்குவரத்து அமைச்சகத்தின் ‘e-Navik’ தளம் வழியாகச் சம்பவ அறிக்கைகள் சேகரிக்கப்பட்டுத் தீவிரமாகக் கண்காணிக்கப்பட்டு வருகிறது. ஏடன் வளைகுடா மற்றும் அரபிக்கடல் பகுதியில் ரோந்துப் பணியில் ஈடுபட்டுள்ள இந்திய கடற்படை கப்பல்கள் மற்றும் மீட்புக் குழுவினர், மாலுமிகளைப் பாதுகாப்பாக மீட்கும் முயற்சிகளில் களமிறங்கியுள்ளனர்.