சுவிட்சர்லாந்தில் பயங்கர தீ விபத்து: 5 பேர் மாயம், 8 பேர் காயம்!

சுவிட்சர்லாந்தில் உணவகம் மற்றும் குடியிருப்புகள் அமைந்திருந்த கட்டடத்தில் ஏற்பட்ட பயங்கர தீ விபத்தில் 5 பேர் காணாமல் போயுள்ளனர்; 8 பேர் காயமடைந்துள்ளனர்.

சுவிட்சர்லாந்தின் கிழக்குப்பகுதியில் உள்ள கிராபியுன்டன் மாகாணத்தின் டுசிஸ் நகரில், கீழ் தளத்தில் உணவகமும் மேல் தளங்களில் குடியிருப்புகளும் கொண்ட கட்டடத்தில் நள்ளிரவு நேரத்தில் திடீரென தீ விபத்து ஏற்பட்டது.

தகவலறிந்து சம்பவ இடத்திற்கு விரைந்த சுமார் 100 தீயணைப்பு வீரர்கள் தீவிர போராட்டத்திற்குப் பின் தீயைக் கட்டுக்குள் கொண்டுவந்தனர்.

கட்டிடத்தின் படிக்கட்டுகள் முற்றிலும் இடிந்து விழுந்ததால், ஹெலிகாப்டர் மற்றும் கிரேன் உதவியுடன் கூரையைப் பிரித்துத் தீயை அணைக்கும் பணி மேற்கொள்ளப்பட்டது. இதனால் அந்த கட்டடம் முழுமையாகச் சேதமடைந்துள்ளது.

கட்டடத்திலிருந்த 14 பேர் தப்பிய நிலையில், 8 பேர் காயங்களுடன் மருத்துவமனையில் அனுமதிக்கப்பட்டுள்ளனர்; இதில் இருவரின் நிலைமை கவலைக்கிடமாக உள்ளது.  

மாயமான 5 பேரைத் தேடும் பணி தொடர்ந்து நடைபெற்று வருகிறது. தீ விபத்திற்கான துல்லியமான காரணம் குறித்து அந்நாட்டு காவல்துறையினரும் அரசு வழக்கறிஞர் அலுவலகமும் இணைந்து விசாரணை நடத்தி வருகின்றனர்.