சுவிட்சர்லாந்துக்கு குடிபெயரும் கோடீஸ்வரர்கள் எண்ணிக்கை குறைவு

கடந்த ஆண்டு சுமார் 3,000 கோடீஸ்வரர்கள் சுவிட்சர்லாந்திற்கு குடிபெயர்ந்த நிலையில், 2026-ஆம் ஆண்டில் இந்த எண்ணிக்கை சுமார் 1,800 ஆகக் குறையும் என நியூ வேர்ல்ட் வெல்த் நிறுவனம் தெரிவித்துள்ளது. இது சுமார் 40 சதவீத வீழ்ச்சியாகும்.

குறைந்த வரிகள், அரசியல் ஸ்திரத்தன்மை மற்றும் பாதுகாப்பு காரணமாக சுவிட்சர்லாந்து தொடர்ந்து செல்வந்தர்களை ஈர்த்தாலும், வரி சலுகைகளில் இத்தாலி உள்ளிட்ட நாடுகள் அதிக போட்டியை ஏற்படுத்தி வருகின்றன.

குறிப்பாக, வெளிநாட்டு வருமானத்திற்கு ஒரே சீரான வரி விதிக்கும் இத்தாலியின் திட்டம், பிரிட்டன் மற்றும் பிரான்ஸ் உள்ளிட்ட நாடுகளைச் சேர்ந்த செல்வந்தர்களை அதிகளவில் ஈர்த்து வருவதாக நிபுணர்கள் கூறுகின்றனர்.

எனினும், ஸூக், ஷ்விட்ஸ், லூசெர்ன் உள்ளிட்ட குறைந்த வரி மாகாணங்கள் தொடர்ந்து கோடீஸ்வரர்களின் முக்கியத் தேர்வாக இருப்பதாக தெரிவிக்கப்பட்டுள்ளது.