ஐரோப்பிய அதிவேக ரயில் வலையமைப்பில் சுவிட்சர்லாந்தையும் இணைக்கத் திட்டம்!

ஸ்ட்ராஸ்பர்க்கில் செவ்வாய்க்கிழமை நடைபெற்ற வாக்கெடுப்பில், இந்தத் திட்டத்தை ஆதரிக்கும் அறிக்கை 558 வாக்குகள் பெற்று அங்கீகரிக்கப்பட்டது. 23 பேர் எதிராக வாக்களித்த நிலையில், 73 பேர் வாக்களிக்கவில்லை.

அதிவேக ரயில்கள் தலைநகரங்களை மட்டுமல்லாமல், நடுத்தர நகரங்கள் மற்றும் புறநகர்ப் பகுதிகளையும் இணைக்க வேண்டும் என நாடாளுமன்ற உறுப்பினர்கள் தெரிவித்துள்ளனர். தற்போது பல ரயில் வலையமைப்புகள் தேசிய எல்லைகளுக்குள் மட்டுமே அமைக்கப்பட்டுள்ளதுடன், நாடுகளுக்கு இடையிலான ரயில் இணைப்புகளும் போதுமானதாக இல்லை எனச் சுட்டிக்காட்டப்பட்டுள்ளது.

இதற்காக நார்வே, சுவிட்சர்லாந்து மற்றும் ஐக்கிய இராச்சியம் உள்ளிட்ட நாடுகளுடன் நெருக்கமான ஒத்துழைப்பை ஏற்படுத்தவும் அழைப்பு விடுக்கப்பட்டுள்ளது. இதற்கிடையில், 2040ஆம் ஆண்டுக்குள் முக்கிய ஐரோப்பிய நகரங்களை மணிக்கு குறைந்தபட்சம் 250 கிலோமீட்டர் வேகத்தில் செல்லும் ரயில்கள் மூலம் இணைப்பதே ஐரோப்பிய ஆணையத்தின் இலக்காக உள்ளது.