40 உக்ரேனியர்களுக்கு வழங்கி வந்த அவசரகால உதவியை ரத்து செய்தது சுவிஸ் Vaud அரசு!

சுவிட்சர்லாந்தின் Vaud மாநில குடிவரவு அலுவலகம், 'S Permit' எனப்படும் சிறப்பு பாதுகாப்பு அந்தஸ்து கோரி விண்ணப்பித்து நிராகரிக்கப்பட்ட சுமார் 40 உக்ரைனிய அகதிகளுக்கு இனி அவசரகால நிதியுதவி வழங்கப்படாது என அறிவித்துள்ளது. 

ஐரோப்பாவின் பிற நாடுகளில் ஏற்கனவே பாதுகாப்பு அந்தஸ்து பெற்றிருப்பவர்களுக்கே சுவிட்சர்லாந்தில் S Permit நிராகரிக்கப்பட்டுள்ளதாக அதிகாரிகள் தெரிவித்துள்ளனர்.

எனவே, அவர்கள் பாதுகாப்பளித்த முந்தைய ஐரோப்பிய நாடுகளுக்கே திரும்ப வேண்டும் என்றும், சுவிஸ் கூட்டாட்சி நீதிமன்றத்தின் தீர்ப்பின் அடிப்படையில் இந்த நடவடிக்கை எடுக்கப்படுவதாகவும் தெரிவிக்கப்பட்டுள்ளது. 

இருப்பினும், இந்த முடிவுக்கு அரசியல் கட்சிகள் மற்றும் மனித உரிமைகள் அமைப்புகள் கடும் எதிர்ப்பு தெரிவித்துள்ளன. அவசரகால உதவி என்பது அடிப்படை மனித உரிமை என்றும், போரினால் பாதிக்கப்பட்ட குடும்பங்களை சுவிட்சர்லாந்தை விட்டு வெளியேற கட்டாயப்படுத்தும் இந்த நடவடிக்கை மனிதநேயமற்றது என்றும் அமைப்புகள் குற்றம் சாட்டியுள்ளன. 

தற்போது இந்த விவகாரம் தொடர்பாக வோ மாநில நீதிமன்றத்தில் மேல்முறையீடு செய்யப்பட்டுள்ள நிலையில், இந்த முடிவு குறித்த விவாதங்கள் சுவிட்சர்லாந்தில் தீவிரமடைந்துள்ளன.