தாகம் தீர்க்கும் மண்பானை நீர்: செரிமானம் முதல் நோய் எதிர்ப்பு சக்தி வரை அரிய நன்மைகள்!

நமது முன்னோர்கள் பயன்படுத்திய மண்பானைத் தண்ணீர் வெறும் தாகத்தை மட்டும் தணிப்பதில்லை; அது எண்ணற்ற மருத்துவக் குணங்களைக் கொண்ட ஒரு இயற்கை அமிழ்தமாகும். மண்பானைத் தண்ணீரை தினமும் குடிப்பதால் கிடைக்கும் நன்மைகளை இங்கு காண்போம்

மண்பானையில் உள்ள கண்ணுக்குத் தெரியாத நுண்ணிய துளைகள் வழியே நீர் ஆவியாகும்போது, தண்ணீரின் வெப்பநிலை இயற்கையாகவே குறைகிறது. மேலும், தண்ணீரில் உள்ள தூசிகள் மற்றும் நச்சுப் பொருட்களை மண் தன்வயப்படுத்தி, தண்ணீரைச் சுத்திகரித்துக் கொடுக்கிறது.

மண் இயற்கையிலேயே காரத்தன்மை கொண்டது. நாம் குடிக்கும் தண்ணீரில் உள்ள அதிகப்படியான அமிலத்தன்மையைச் சமன் செய்து, உடலின் pH அளவைச் சீராக வைக்க மண்பானை உதவுகிறது. இதனால் நெஞ்செரிச்சல் மற்றும் வயிற்றுப் புண் ஏற்படுவது தடுக்கப்படுகிறது.

குளிர்சாதனப் பெட்டி நீர் இரத்தக் குழாய்களைச் சுருங்கச் செய்து செரிமானத்தை தாமதப்படுத்தும். ஆனால், மண்பானைத் தண்ணீர் குடலின் இயக்கத்தைச் சீராக்கி, வளர்சிதை மாற்றத்தை அதிகரித்துச் செரிமானக் கோளாறுகளைக் குணப்படுத்துகிறது.

ஃப்ரிட்ஜ் தண்ணீரை நேரடியாகக் குடிப்பதால் தொண்டை அழற்சி, இருமல் மற்றும் ஆஸ்துமா பிரச்சினைகள் தீவிரமடையும். மண்பானை நீர் தொண்டைக்கு எவ்விதப் பாதிப்பையும் ஏற்படுத்தாமல், இதமான குளிர்ச்சியை மட்டும் வழங்கிச் சளித் தொல்லையில் இருந்து பாதுகாக்கிறது.

மண்ணில் இயற்கையாகவே கால்சியம், மெக்னீசியம், இரும்புச்சத்து மற்றும் பாஸ்பரஸ் போன்ற உடலுக்குத் தேவையான அத்தியாவசியத் தாதுக்கள் நிறைந்துள்ளன. மண்பானையில் தண்ணீரை ஊற்றி வைக்கும் போது, அந்த ஊட்டச்சத்துக்கள் தண்ணீரில் கலந்து உடலுக்குச் புத்துணர்ச்சியை அளிக்கின்றன.

புதிய மண்பானையை வாங்கியவுடன் அப்படியே பயன்படுத்தாமல், 2-3 நாட்கள் தண்ணீரில் ஊறவைத்து, நன்கு கழுவிய பின்னரே குடிநீரை ஊற்றி வைக்க வேண்டும்.

பானையின் உட்பகுதியைச் சுத்தம் செய்யச் சோப்பு அல்லது ரசாயனங்களை உபயோகிக்கக் கூடாது. தேங்காய் நார் அல்லது மென்மையான பிரஷ் கொண்டு சுடுநீரில் கழுவுவதே போதுமானது.

தினமும் பானையில் உள்ள பழைய தண்ணீரை மாற்றிப் புதிய தண்ணீரை ஊற்றி வைப்பது சிறந்தது.

செயற்கைக் குளிர்ச்சியைத் தரும் குளிர்சாதனப் பெட்டிகளைத் தவிர்த்து, இயற்கை தந்த கொடையான மண்பானையைப் பயன்படுத்துவோம்! நோயற்ற வாழ்வை நோக்கி அடியெடுத்து வைப்போம்!