2027 முதல் 'நேரடி பற்று' சேவையை அறிமுகம் செய்கிறது 'Twint' செயலி: சுவிட்சர்லாந்தில் புதிய அறிவிப்பு!

சுவிட்சர்லாந்தில் வழக்கத்தில் உள்ள 'LSV+' என்ற பாரம்பரிய நேரடி பற்று முறை, வரும் 2028 செப்டம்பர் 30-ஆம் தேதியுடன் முடிவுக்கு வரவுள்ளது. இதற்கு மாற்றாக, 2027-ஆம் ஆண்டிலேயே இந்த புதிய டிஜிட்டல் வசதியை ட்வின்ட் நிறுவனம் அறிமுகப்படுத்துகிறது. 

இதன் மூலம் 60 லட்சத்திற்கும் அதிகமான ட்வின்ட் பயனர்கள், தங்களின் மாதாந்திர மின்சாரக் கட்டணம், மருத்துவக் காப்பீடு சந்தாக்கள் மற்றும் இதர கட்டணங்களை இனி ட்வின்ட் செயலி வாயிலாகவே நேரடியாகச் செலுத்த அனுமதி அளிக்க முடியும்.

சுவிட்சர்லாந்தின் முக்கிய வங்கிகள் அனைத்தின் ஆதரவோடும் இந்த சேவை நடைமுறைக்கு வருகிறது. இது குறித்து பேசிய ட்வின்ட் நிறுவனத்தின் தலைமை நிர்வாக அதிகாரி மார்கஸ் கில்ப் (Markus Kilb), "இந்த வசதி சுவிஸ் மக்களின் அன்றாடக் கட்டணப் பரிவர்த்தனைகளை மிகவும் எளிமையாகவும், பாதுகாப்பாகவும் மாற்றும்" என்று தெரிவித்துள்ளார்.