மத்திய அமைச்சரவை விரைவில் மாற்றம்: 12 புதுமுகங்களைச் சேர்க்கப் பிரதமர் மோடி திட்டம்.

டெல்லி அரசியல் களத்தில் பெரும் பரபரப்பு! பிரதமர் நரேந்திர மோடி தலைமையிலான மத்திய அமைச்சரவை விரைவில் மாற்றம் செய்யப்படவுள்ள நிலையில், 12 புதுமுகங்களுக்கு வாய்ப்பளிக்க பிரதமர் மோடி அதிரடி முடிவு எடுத்துள்ளதாகத் தகவல்கள் வெளியாகியுள்ளன.

பிரதமர் மோடி தலைமையிலான அரசு தனது மூன்றாவது ஆட்சிக்காலத்தின் முதல் அமைச்சரவை மாற்றத்திற்குத் தயாராகி வருகிறது. அரசின் செயல்பாடுகளை மேலும் விறுவிறுப்பாக்கவும், வரவிருக்கும் மாநிலச் சட்டசபை தேர்தல்களை எதிர்கொள்ளவும் ஏதுவாக இந்த அமைச்சரவை மாற்றம் அமையவுள்ளது.

தற்போதைய அமைச்சரவையில் 12 புதிய முகங்களைச் சேர்க்கப் பிரதமர் மோடி திட்டமிட்டுள்ளதாகத் தெரிகிறது. குறிப்பாக இளைஞர்கள், பெண் எம்பிக்கள் மற்றும் திறம்பட செயல்படும் நிர்வாகிகளுக்கு முன்னுரிமை அளிக்கப்படவுள்ளது. 

அதேவேளையில், திருப்திகரமாகச் செயல்படாத சில அமைச்சர்கள் விடுவிக்கப்பட்டு கட்சிப் பணிகளுக்கு அனுப்பப்படலாம் எனவும் கூறப்படுகிறது.

உத்தரப் பிரதேசம் உள்ளிட்ட முக்கிய மாநிலங்களுக்கு கூடுதல் பிரதிநிதித்துவம் வழங்கப்பட வாய்ப்புள்ளதாகக் கூறப்படுகிறது. குடியரசுத் தலைவர் மாளிகையில் இதற்கான முதற்கட்ட ஆயத்தப் பணிகள் தொடங்கப்பட்டுள்ள நிலையில், விரைவில் அதிகாரப்பூர்வ அறிவிப்பு வெளியாகலாம் என்று டெல்லி வட்டாரங்கள் தெரிவிக்கின்றன.