இலங்கையில் ரூ.1 பில்லியன் டொலர் உண்டியல் மோசடி!

இலங்கையில் எந்தவிதப் பொருட்களையும் நாட்டிற்குள் இறக்குமதி செய்யாமல், 'உண்டியல்' முறை மூலம் சட்டவிரோதமாகச் சுமார் 1 பில்லியன் அமெரிக்க டொலர் நிதியை வெளிநாடுகளுக்கு அனுப்பிய குற்றச்சாட்டின் கீழ், நாட்டின் 4 பிரதான தனியார் வங்கிகளின் முகாமையாளர்கள் நால்வர் குற்றப்புலனாய்வுத் திணைக்களத்தின் (CID) நிதி குற்றப் புலனாய்வுப் பிரிவினரால் கைது செய்யப்பட்டுள்ளனர்.

கொழும்பு நீதவான் நீதிமன்றத்தில் ஆஜர்படுத்தப்பட்ட இவர்களை, வரும் ஆகஸ்ட் 20ஆம் திகதி வரை விளக்கமறியலில் வைக்குமாறு நீதவான் உத்தரவிட்டுள்ளார்.

வங்கிச் கிளைகளுக்குள்ளேயே வைத்து 4 வங்கி முகாமையாளர்களும் இவ்வாறு கைது செய்யப்பட்ட நடவடிக்கை இலங்கை வரலாற்றில் முதன்முறையாகப் பதிவாகியுள்ளது.  

இந்தச் சட்டவிரோதப் பணப் பரிமாற்ற மோசடியுடன் தொடர்புடைய "ஜெப்ரி மொஹமட்" என்ற சந்தேகநபரின் கைதுக்குப் பிறகே, அதற்கு உடந்தையாகச் செயற்பட்ட இந்த வங்கி முகாமையாளர்கள் அடையாளம் காணப்பட்டு கைது செய்யப்பட்டுள்ளனர்.

 இவ்விவகாரம் தொடர்பில் குற்றப்புலனாய்வுத் திணைக்களத்தின் நிதி குற்றப் புலனாய்வுப் பிரிவினர் தீவிர மேலதிக விசாரணைகளை மேற்கொண்டு வருகின்றனர்.