போர் முடிந்து 17 ஆண்டுகள்: இலங்கையில் நீதி இன்னும் எட்டாக்கனி! ஐ.நா. மனித உரிமைகள் ஆணையாளர் அறிக்கை!

இலங்கையில் மூன்று தசாப்தங்களுக்கும் மேலாக நடைபெற்ற கொடூரமான உள்நாட்டுப் போர் நிறைவடைந்து 17 ஆண்டுகள் கடந்துள்ள நிலையிலும், பாதிக்கப்பட்ட மக்களுக்கு இன்னமும் முழுமையான நீதியும் பொறுப்புக்கூறலும் எட்டாக்கனியாகவே நீடிப்பதாக ஐக்கிய நாடுகள் சபை மிகக் கடுமையான கவலையை வெளியிட்டுள்ளது.

ஐ.நா. மனித உரிமைகளுக்கான உயர் ஆணையாளர் வோல்கர் டர்க் வெளியிட்டுள்ள அண்மைய அறிக்கையிலேயே இலங்கையின் தற்போதைய மனித உரிமைச் சூழல் மற்றும் பொறிமுறைகள் குறித்து இந்த அதிர்ச்சித் தகவல்கள் சுட்டிக்காட்டப்பட்டுள்ளன.

போர்க்காலத்தில் இடம்பெற்ற கடுமையான மனித உரிமை மீறல்கள், சர்வதேச மனிதநேயச் சட்ட மீறல்கள் தொடர்பில் உறுதியான மற்றும் நம்பகமான விசாரணைகள் நடத்தப்படவில்லையென அறிக்கை சாடுகிறது.

பலவந்தமாகக் காணாமல் ஆக்கப்பட்டோரின் குடும்பங்களுக்குப் பதில் அளிப்பதிலும், அவர்களுக்கான நீதியை உறுதி செய்வதிலும் நிலவும் மந்தமான போக்கு தொடர்ந்து வேதனையளிப்பதாகக் குறிப்பிடப்பட்டுள்ளது.

சிவில் சமூகப் பிரதிநிதிகள், ஊடகவியலாளர்கள் மற்றும் பாதிக்கப்பட்ட மக்களின் உரிமைகளைப் பாதுகாக்கும் சூழல் இன்னும் முழுமையாக உருவாக்கப்படவில்லை என ஐ.நா. சுட்டிக்காட்டியுள்ளது.

ஐ.நா. உயர் ஆணையாளர் வோல்கர் டர்க் வலியுறுத்தல்

"கடந்தகாலப் வடுக்களை ஆறவைக்கவும், நாட்டில் நிலையான அமைதியை ஏற்படுத்தவும் உண்மைகளைக் கண்டறிவதும், பாதிக்கப்பட்டவர்களுக்கு உரிய நீதி வழங்குவதும் அவசியமானது. வெறுமனே வாக்குறுதிகளோடு நிற்காமல், பொறுப்புக்கூறலை உறுதிசெய்யும் வெளிப்படையான நடவடிக்கைகளை இலங்கை அரசு உடனடியாக எடுக்க வேண்டும்" என வோல்கர் டர்க் வலியுறுத்தியுள்ளார்.

அத்துடன், சர்வதேச சமூகமும் இலங்கையின் மனித உரிமை நிலவரங்களைத் தொடர்ந்து கண்காணிக்க வேண்டும் என்றும், உலகளாவிய அதிகாரத்தின் கீழ் போர்க்குற்றங்களில் ஈடுபட்டவர்கள் மீது நடவடிக்கை எடுக்க உறுப்பு நாடுகள் முன்வர வேண்டும் என்றும் அந்த அறிக்கையில் கேட்டுக்கொள்ளப்பட்டுள்ளது.

போர் முடிவுக்கு வந்த பின்னரும், மனித உரிமைகள் மற்றும் இனப்பிரச்சினைக்கான தீர்வு விவகாரத்தில் குறிப்பிடத்தக்க முன்னேற்றம் ஏதும் ஏற்படவில்லை என்பதை ஐ.நா.வின் இந்த அறிக்கை தெளிவுபடுத்தியுள்ளது. வரவிருக்கும் ஐ.நா. மனித உரிமைகள் பேரவையின் கூட்டத்தொடரில் இந்த அறிக்கை சமர்ப்பிக்கப்பட்டு விவாதிக்கப்படவுள்ளதால், சர்வதேச அரங்கில் இலங்கை அரசுக்கு மீண்டும் அழுத்தம் அதிகரிக்கும் என எதிர்பார்க்கப்படுகிறது.