செஸ் வரிக்கு விடைகொடுக்கிறது இலங்கை: உற்பத்தியாளர்களை ஊக்குவிக்க அரசின் புதிய அதிரடி!

உள்நாட்டுத் தொழில்முனைவோரைப் பாதுகாக்கும் நோக்கத்துடன் இறக்குமதி செய்யப்படும் பொருட்கள் மீது விதிக்கப்பட்டுள்ள ‘செஸ்’ வரியை முழுமையாக நீக்கிவிட்டு, புதிய சுங்கவரி முறையொன்றை அறிமுகப்படுத்த அரசாங்கம் தீர்மானித்துள்ளது.

அதற்கமைய, முதற்கட்டமாக கட்டம் கட்டமாக இந்த செஸ் வரிகள் நீக்கப்படும் என்று நிதி மற்றும் திட்டமிடல் பிரதி அமைச்சர் அனில் ஜயந்த பெர்னாண்டோ தெரிவித்துள்ளார்.

உள்நாட்டுத் தொழில்களைப் பாதுகாப்பதற்காகவே முன்னதாக செஸ் வரி விதிக்கப்பட்ட போதிலும், நாட்டின் பெரும்பாலான உள்நாட்டு உற்பத்திகள் வெளிநாடுகளில் இருந்து இறக்குமதி செய்யப்படும் மூலப்பொருட்களையே பெரிதும் நம்பியுள்ளன. இதனால் உற்பத்திச் செலவு கணிசமாக உயர்ந்து காணப்படுவதாகச் சுட்டிக்காட்டப்பட்டுள்ளது.

இதனைக் கருத்தில் கொண்டு, முதற்கட்டமாக இடைநிலைப் பொருட்களுக்கான செஸ் வரியைப் படிப்படியாக நீக்க நடவடிக்கை எடுக்கப்பட்டு வருகிறது. இதன் மூலம் உள்நாட்டு உற்பத்திச் செலவு குறையும் என்பதுடன், உள்நாட்டுத் தொழில்களுக்குப் பாதிப்பு ஏற்படாத வகையில் முறையான உற்பத்திச் செயல்பாட்டிற்கு உற்பத்தியாளர்களைப் பழக்கப்படுத்த முடியும் என்றும் அரசாங்கம் எதிர்பார்க்கிறது.