இலங்கை கடற்பரப்பில் முடங்கிய 20 ஈரானியக் கப்பல்கள்: அமெரிக்காவின் தடைகளால் சிக்கல்!

இலங்கையின் தென்மேற்கு மற்றும் தெற்குக் கடலோரப் பகுதியிலிருந்து சுமார் 15 மைல் (சர்வதேச கடல் எல்லைக்கு அப்பாற்பட்ட பகுதியில்) தொலைவில் இந்தக் கப்பல்கள் நங்கூரமிட்டுள்ளன. 

இவை இலங்கையின் பிராந்தியக் கடல் எல்லைக்குள் நுழையவில்லை என்பதால் சட்டரீதியான தலையீடுகளை மேற்கொள்ள முடியாது என்றும், இருப்பினும் இலங்கை கடற்படை நிலைமையை உன்னிப்பாகக் கண்காணித்து வருவதாகவும் வெளிவிவகார அமைச்சு மற்றும் கடற்படை அதிகாரிகள் உறுதிப்படுத்தியுள்ளனர்.  

அமெரிக்காவின் தடைகள் காரணமாக இந்தக் கப்பல்களுக்குத் தேவையான எரிபொருள், குடிநீர் மற்றும் உணவுப் பொருட்களைப் பெறுவதில் பெரும் சிரமம் ஏற்பட்டுள்ளது. இதனால் கப்பல்களில் உள்ள மாலுமிகள் மற்றும் ஊழியர்களின் அன்றாட ஜீவனோபாயப் தேவைகளுக்குத் தட்டுப்பாடு நிலவுவதாகக் கூறப்படுகிறது.

இந்தக் கப்பல்கள் இலங்கை அரசிடமிருந்து இதுவரை உத்தியோகபூர்வமாக எந்தவித உதவியையோ அல்லது துறைமுக வசதிகளையோ கோரவில்லை என்றும், அவ்வாறு கோரிக்கை ஏதும் விடுக்கப்பட்டால் சர்வதேச கடல்சார் சட்டங்களின் அடிப்படையில் பரிசீலிக்கப்படும் என்றும் அதிகாரிகள் தெரிவித்துள்ளனர்.

அமெரிக்கா மற்றும் ஈரானுக்கு இடையே நிலவும் தீவிரமான பொருளாதார மோதல்களுக்கு மத்தியில், இலங்கை கடற்பரப்பிற்கு அருகில் இத்தனை கப்பல்கள் முடங்கியிருப்பது சர்வதேச அளவில் பெரும் கவனத்தை ஈர்த்துள்ளது.