சுவிட்சர்லாந்தில் வணிக திவால்நிலைகள் 37 சதவீதம் அதிகரிப்பு

ஜனவரி முதல் செப்டம்பர் வரையிலான காலகட்டத்தில் மொத்தம் 11 ஆயிரத்து 412 நிறுவனங்கள் திவாலாகியுள்ளன. இது கடந்த ஆண்டின் இதே காலகட்டத்துடன் ஒப்பிடும்போது 37 சதவீதம் அதிகமாகும்.

கட்டுமானத் துறையில் 1,380 நிறுவனங்களும், உணவுத் தொழிலில் 1,019 நிறுவனங்களும், சில்லறை வணிகத் துறையில் 895 நிறுவனங்களும் திவாலாகியுள்ளன. சில்லறை வணிகத்தில் மட்டும் திவால்நிலைகள் 51 சதவீதம் அதிகரித்துள்ளன.

இந்தப் புள்ளிவிவரங்களை கடன் மற்றும் வணிகத் தகவல் சேவைகளில் நிபுணத்துவம் பெற்ற கிரிஃப் நிறுவனம் வெளியிட்டுள்ளது.

திவால்நிலைகள் அதிகரித்ததற்கு சட்ட மாற்றமும் ஒரு காரணமாக இருப்பதாக அந்த நிறுவனம் தெரிவித்துள்ளது. 2025 ஜனவரி 1 முதல், வணிகப் பதிவேட்டில் இடம்பெற்றுள்ள நிறுவனங்களின் வரிக் கடன்களையும் திவால் நடவடிக்கைகள் மூலம் வசூலிக்க முடியும்.

பிராந்திய அளவில் கிராபுண்டனில் திவால்நிலைகள் 95 சதவீதம் அதிகரித்து 218 ஆகவும், டிசினோவில் 48 சதவீதம் அதிகரித்து 721 ஆகவும் பதிவாகியுள்ளன.

முழுமையான எண்ணிக்கையில் சூரிச் மாகாணத்தில் 1,850 நிறுவனங்கள் திவாலாகியுள்ளன. ஜெனீவாவில் 1,369 நிறுவனங்களும், வாட் மாகாணத்தில் 1,006 நிறுவனங்களும் திவாலாகியுள்ளன.

அதேவேளை, புதிய நிறுவனங்கள் தொடங்கும் எண்ணிக்கையும் அதிகரித்துள்ளது. முதல் ஒன்பது மாதங்களில் சுவிட்சர்லாந்தில் 40 ஆயிரத்து 487 புதிய நிறுவனங்கள் பதிவு செய்யப்பட்டுள்ளன. இது கடந்த ஆண்டைவிட 2 சதவீதம் அதிகமாகும்.

புதிய நிறுவனங்கள் தொடங்குவதில் வணிக ஆலோசனை, சொத்துத் துறை மற்றும் கட்டுமானத் துறைகள் முன்னணியில் உள்ளன.