மூன்றாவது பரஸ்பர மதிப்பீட்டுக்கான தயார்நிலை குறித்து ஜனாதிபதி தலைமையில் கலந்துரையாடல்

2026 ஒக்டோபர் 26ஆம் திகதி முதல் நவம்பர் 06ஆம் திகதி வரை நடைபெறவுள்ள இந்த மூன்றாவது பரஸ்பர மதிப்பீட்டுக்கான தயார்நிலை தொடர்பில் விரிவாக ஆராயப்பட்டதுடன், இதற்காக முன்வைக்கப்பட்ட பரிந்துரைகள் மற்றும் அவற்றை அமைச்சு மற்றும் நிறுவன மட்டங்களில் நடைமுறைப்படுத்துவதன் முன்னேற்றம் குறித்தும் மீளாய்வு செய்யப்பட்டது.

இலங்கை எதிர்கொண்டுள்ள அபாயங்களை அடையாளம் கண்டு, அவற்றைக் குறைப்பதற்குத் தேவையான சட்ட ஏற்பாடுகள் மற்றும் நிறுவன ரீதியான மறுசீரமைப்புகளை மேற்கொள்ள வேண்டியதன் அவசியத்தை ஜனாதிபதி இதன்போது வலியுறுத்தினார்.

மேலும், இந்த நடவடிக்கைகள் வெளித் தரப்பினரின் அழுத்தங்களுக்காக மேற்கொள்ளப்படுபவை அல்ல என்றும், நாட்டின் நிறுவன கட்டமைப்புக்கும் நாட்டின் நலனுக்கும் அவசியமான நடவடிக்கைகள் என்றும் ஜனாதிபதி சுட்டிக்காட்டினார்.

இந்த மதிப்பீட்டு செயல்முறை தொடர்பான ஒருங்கிணைப்புப் பணிகளை இலங்கை மத்திய வங்கியில் நிறுவப்பட்டுள்ள நிதிப் புலனாய்வுப் பிரிவு மேற்கொண்டு வருகிறது. தொழில்நுட்ப இணக்கம், பரிந்துரைகள் மற்றும் செயற்றிறன் தொடர்பிலும் அதிகாரிகள் ஜனாதிபதிக்கு விளக்கமளித்தனர்.

குற்றச் செயல்கள் மூலம் ஈட்டப்பட்ட சொத்துக்கள் தொடர்பான சட்டத்தைச் செயற்பாட்டு நிலைக்கு கொண்டு வருதல், நிறுவனச் சட்டம் மற்றும் அதன் செயற்பாடுகள், நம்பிக்கைப் பொறுப்பு கட்டளைச் சட்டத்தில் திருத்தங்களை மேற்கொள்ளுதல் உள்ளிட்ட பல்வேறு நடவடிக்கைகள் தொடர்பிலும் கலந்துரையாடப்பட்டது.

பரிந்துரைகளை நடைமுறைப்படுத்துவதில் காணப்படும் குறைபாடுகள் அல்லது தாமதங்களை உடனடியாகத் திருத்தி, எதிர்வரும் மூன்று வாரங்களுக்கு அரசாங்கமும் நிறுவன கட்டமைப்பும் முழுமையான அர்ப்பணிப்புடன் செயற்பட வேண்டும் எனவும் ஜனாதிபதி வலியுறுத்தினார்.

இலங்கையின் சர்வதேச நிதிக் கட்டமைப்பில் நம்பகத்தன்மையை உறுதிப்படுத்தும் இந்த மூன்றாவது மதிப்பீட்டு செயல்முறையை வெற்றிகரமாக நிறைவேற்றுவது, நாட்டின் முக்கிய பொறுப்பாகும் எனவும் ஜனாதிபதி குறிப்பிட்டார்.

இதற்காக அனைத்து அரச மற்றும் தனியார் துறை நிறுவனங்களின் தீவிர பங்களிப்பையும் எதிர்பார்ப்பதாக அவர் தெரிவித்தார். கடந்த காலங்களில் இந்தப் பணிகளில் அர்ப்பணிப்புடன் செயற்பட்ட இலங்கை மத்திய வங்கி உள்ளிட்ட அனைத்து தரப்பினருக்கும் ஜனாதிபதி நன்றி தெரிவித்தார்.