அமெரிக்க ராணுவத்தின் அதிரடி திட்டம்: 2.2 பில்லியன் டாலர் செலவில் அணுசக்தி நுண் உலைகள் உருவாக்கம்!

அமெரிக்க ராணுவ தளங்களுக்குத் தேவையான மின்சார உற்பத்திக்காக அதிநவீன 'நுண் அணு உலைகளை' (Nuclear Microreactors) நிறுவ அமெரிக்க அரசு முடிவு செய்துள்ளது.

 சுமார் 2.2 பில்லியன் அமெரிக்க டாலர் மதிப்பிலான 'ஜானஸ்' (Janus) திட்டத்தின் கீழ், 5 முக்கிய நிறுவனங்களுக்கு இந்த உலைகளைக் கட்டுவதற்கான ஒப்பந்தங்கள் வழங்கப்பட்டுள்ளன.

லாரிகள் மூலம் எளிதாக எடுத்துச் செல்லக்கூடிய வகையில் வடிவமைக்கப்படும் இந்தச் சிறிய அணு உலைகள், அவசர காலங்களில் அல்லது இயற்கை சீற்றங்களின் போது ராணுவ தளங்களுக்குத் தடையற்ற மின்சாரத்தை வழங்கும் திறன் கொண்டவை. 

போர்ட் பிராக், போர்ட் டிராம் உள்ளிட்ட 5 முக்கிய ராணுவ மையங்களில் முதற்கட்டமாக இந்த நுண் உலைகள் அமைக்கப்பட உள்ளன. வரும் 2028-ஆம் ஆண்டிற்குள் இத்திட்டத்தின் முதல் அணு உலையை வெற்றிகரமாகச் செயல்பாட்டிற்குக் கொண்டுவர அமெரிக்க ராணுவம் தீவிரமாகச் செயல்பட்டு வருகிறது.