இந்தியாவில் 700% வரை உயர்ந்த விமானக் கட்டணம்: "பயணிக்காதீர்கள்" என இந்திய உச்ச நீதிமன்றம் கூறியதால் சர்ச்சை!

இந்தியாவில் பண்டிகைக் காலங்கள் மற்றும் தொடர் விடுமுறை நாட்களில், தனியார் விமான நிறுவனங்கள் கட்டணங்களை 700 சதவீதம் வரை உயர்த்துவதைக் கட்டுப்படுத்தக் கோரி, இந்திய உச்ச நீதிமன்றத்தில் வழக்குத் தொடரப்பட்டது.

ஏலச்சீட்டு முறையைப் போல விண்ணைத் தொடும் விமானக் கட்டணங்களுக்கு மத்திய அரசு ஒரு குறிப்பிட்ட உச்சவரம்பு நிர்ணயிக்க வேண்டும் என்பது இந்தியப் பயணிகளின் நீண்ட நாள் கோரிக்கையாகும். இந்தச் சூழலில் மனுவை விசாரித்த உச்ச நீதிமன்ற நீதிபதிகள், "கட்டணம் அதிகமாக இருந்தால் பொதுமக்கள் விமானத்தில் பயணிக்க வேண்டாம்; மாற்றுப் போக்குவரத்து வழிகளைப் பயன்படுத்தலாம்" எனத் தெரிவித்தனர்.

இந்திய உச்ச நீதிமன்றத்தின் இந்தப் பதில் பயணிகள் மத்தியில் பெரும் அதிர்ச்சியையும் சர்ச்சையையும் உருவாக்கியுள்ளது. விமானக் கட்டணங்களைக் கட்டுப்படுத்துவதில் இந்திய அரசு மற்றும் நுகர்வோர் பாதுகாப்பு அமைப்புகளின் ஒழுங்குமுறைப் பற்றாக்குறை குறித்த விவாதங்களை உச்ச நீதிமன்றத்தின் இந்தக் கருத்து மீண்டும் தீவிரப்படுத்தியுள்ளது.