விமானப் போக்குவரத்துத் துறை மேம்பாடு மற்றும் பயணிகள் நலன்: இந்திய மத்திய அரசு புதிய விமான விதிகளுக்கு ஒப்புதல்!

1937-ஆம் ஆண்டைய பழமையான விதிகளுக்குப் பதிலாக உருவாக்கப்பட்டுள்ள இந்தப் புதிய விதிகள், வரும் 2027-ஆம் ஆண்டு ஜனவரி 1-ஆம் தேதி முதல் நாடு முழுவதும் அமலுக்கு வரும் என அறிவிக்கப்பட்டுள்ளது.

மத்திய சிவில் விமானப் போக்குவரத்து அமைச்சகம் வெளியிட்டுள்ள புதிய 'பாரதிய வாயுயான் விதிகள் 2026' (Bharatiya Vayuyan Niyam) மூலம், விமானக் கட்டண நிர்ணயம் மற்றும் சேவைகளில் வெளிப்படைத்தன்மை அதிகரிக்கப்படவுள்ளது.  

இந்தப் புதிய விதிகளின்படி, பயணிகள் டிக்கெட் முன்பதிவு செய்யும்போது, அடிப்படை கட்டணம், அரசு வரிகள், கூடுதல் கட்டணங்கள், டிக்கெட் ரத்து செய்வதற்கான விபரங்கள் மற்றும் பணத்தைத் திரும்பப் பெறும் நடைமுறைகள் உள்ளிட்ட முழுமையான விபரங்களை விமான நிறுவனங்கள் வெளிப்படையாகத் தெரிவிக்க வேண்டும்.  

மேலும், அவசர காலங்கள் அல்லது எதிர்பாராத அசாதாரண சூழ்நிலைகளின்போது விமானக் கட்டணம் கட்டுக்கடங்காமல் உயர்வதைத் தடுக்க, மத்திய அரசு தற்காலிகமாகக் தலையிட்டு கட்டணக் கட்டுப்பாடு விதிக்கவும் இந்தப் புதிய விதிகள் அதிகாரம் வழங்குகின்றன.