மக்கள் வங்கியின் புதிய தலைவராக சந்தன குணியங்கொட கடமைகளைப் பொறுப்பேற்றார்!

இலங்கையின் முன்னணி அரசு வர்த்தக வங்கிகளில் ஒன்றான மக்கள் வங்கியின் புதிய தலைவராக நிதியியல் துறை நிபுணரான சந்தன குணியங்கொட கடமைகளைப் பொறுப்பேற்றுக்கொண்டார். 

கொழும்பிலுள்ள மக்கள் வங்கியின் தலைமை அலுவலகத்தில் நடைபெற்ற நிகழ்வில் அவர் முறைப்படி தனது பொறுப்புகளை ஏற்றுக்கொண்டார். நிதி, வணிக வங்கி மற்றும் உத்தி சார்ந்த மேலாண்மைத் துறைகளில் 28 ஆண்டுகளுக்கும் மேலான அனுபவம் கொண்ட சந்தன குணியங்கொட, சர்வதேச மற்றும் உள்நாட்டு வங்கித் துறைகளில் பல்வேறு முக்கிய பதவிகளை வகித்துள்ளவர் ஆவார்.  

நாட்டின் பொருளாதார வளர்ச்சி மற்றும் வங்கித் துறையின் முன்னேற்றத்தில் மக்கள் வங்கி முக்கிய பங்கு வகித்து வரும் சூழலில், புதிய தலைவரின் அனுபவமும் வழிகாட்டலும் வங்கியின் சேவைகளை மேலும் வலுப்படுத்த உதவும் என எதிர்பார்க்கப்படுகிறது.  

இந்நிகழ்வில் மக்கள் வங்கியின் முன்னாள் தலைவர், பணிப்பாளர் சபையின் உறுப்பினர்கள், வங்கியின் தலைமை நிர்வாக அதிகாரி மற்றும் உயர் அதிகாரிகள் பலரும் கலந்துகொண்டு அவருக்குத் தமது வாழ்த்துகளைத் தெரிவித்தனர்.