தலவத்துகொடயில் துணிச்சலான கொள்ளை: 6 கோடி ரூபா பணம், நகைகளுடன் 4 பேர் தப்பி ஓட்டம்!

கொழும்பு தலவத்துகொட பகுதியில் அமைந்துள்ள பிரபல பயண முகவர் நிலையத்திற்குள் புகுந்த நான்கு நபர்கள் கொண்ட கொள்ளையர் குழு, அங்கிருந்த சுமார் 6 கோடி ரூபா பெறுமதியான பணம் மற்றும் தங்கப் பொருட்களைக் கொள்ளையடித்துத் தப்பிச் சென்றுள்ளது.

பயண முகவர் நிலையத்திற்கு வாடிக்கையாளர்களைப் போல் வருகை தந்த நான்கு நபர்கள், திடீரென அங்கிருந்த ஊழியர்களை அச்சுறுத்தி, கட்டுப்படுத்தி வைத்துள்ளனர். தொடர்ந்து, நிலையத்திலிருந்த பெருந்தொகை ரொக்கப் பணம் மற்றும் நகைகளை கொள்ளையடித்துக்கொண்டு மின்னல் வேகத்தில் தப்பிச் சென்றுள்ளனர்.

கொள்ளையடிக்கப்பட்ட பணம் மற்றும் பொருட்களின் மொத்தப் பெறுமதி சுமார் 6 கோடி ரூபா எனக் கணக்கிடப்பட்டுள்ளது.

இச்சம்பவம் தொடர்பில் கிடைக்கப்பெற்ற முறைப்பாட்டையடுத்து, தலவத்துகொடை பொலிஸார் தீவிர விசாரணைகளை ஆரம்பித்துள்ளனர். கொள்ளையர்களை அடையாளம் காண்பதற்காக சம்பவ இடத்தில் பொருத்தப்பட்டிருந்த CCTV காணொளிகளை பொலிஸார் ஆய்வு செய்து வருகின்றனர்.

சந்தேகநபர்களைக் கைது செய்ய விஷேட பொலிஸ் குழுக்கள் நியமிக்கப்பட்டுள்ளதாக பொலிஸ் ஊடகப் பிரிவு தெரிவித்துள்ளது.