45 பேரைக் காயப்படுத்தி 7 பேரைக் கொன்ற ஓட்டுநர்: 13 ஆண்டுகள் சிறை தண்டனையுடன் ஓட்டுநர் உரிமமும் ரத்து!

2017 இல் கொழும்பில் இருந்து யாழ்ப்பாணம் நோக்கிப் பயணித்த தனியார் பேருந்து சிலாபத்தில் விபத்துக்குள்ளானதில் 7 பேர் பரிதாபமாக உயிரிழந்ததுடன் 45 பேர் படுகாயமடைந்த வழக்கில், குற்றம் சாட்டப்பட்ட ஓட்டுநருக்கு 13 ஆண்டுகள் மற்றும் 3 மாதங்கள் கடுமையான சிறைத்தண்டனை விதித்து மேல்முறையீட்டு நீதிமன்றம் உறுதி தீர்ப்பளித்துள்ளது.

அதிவேகமாகவும் அலட்சியமாகவும் பேருந்தை இயக்கி இந்த விபத்தை ஏற்படுத்தியதாக ஓட்டுநர் மீது சுமத்தப்பட்ட குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதை அடுத்து இந்த அதிரடித் தீர்ப்பு வழங்கப்பட்டுள்ளது.

வழக்கின் விசாரணைகள் முடிவடைந்த நிலையில், ஓட்டுநருக்கு 13 ஆண்டுகள் மற்றும் 3 மாதங்கள் கடுங்காவல் சிறைத்தண்டனை விதிக்கப்பட்டது.

ஓட்டுநரின் அலட்சியப் போக்கினால் ஏற்பட்ட இந்த பெரும் இழப்பைக் கருத்தில் கொண்டு, அவரது ஓட்டுநர் உரிமத்தையும் இரத்து செய்ய நீதிமன்றம் உத்தரவிட்டுள்ளது.