இலங்கையில் போதைப்பொருள் பழக்கத்திற்கு சிறைத் தண்டனைக்கு பதிலாக சமூக மறுவாழ்வுக்கு முக்கியத்துவம்

இலங்கையில் போதைப்பொருள் பழக்கத்திற்கு அடிமையானவர்களைச் சிறையில் அடைப்பதற்கு மாற்றாக,சமூகம் சார்ந்த மறுவாழ்வுத் திட்டங்களை வலுப்படுத்துதல்,குற்றத் தடுப்பில் பொதுமக்களின் பங்கேற்பை அதிகரித்தல் மற்றும் தற்போதைய தேவைகளுக்கு ஏற்ப நிலவும் சட்டங்களில் திருத்தம் செய்தல் ஆகியவற்றின் அவசியம் குறித்து ஆட்சி, நீதி மற்றும் சிவில் பாதுகாப்பு பற்றிய துறைசார் மேற்பார்வைக் குழுவில் கவனம் செலுத்தப்பட்டது.

சிறைச்சாலைகளில் ஏற்படும் நெரிசலைக் குறைப்பதற்கு எடுக்கக்கூடிய நடவடிக்கைகள் குறித்து இலங்கை பொலிஸ் திணைக்களத்தின் கருத்துக்கள் மற்றும் முன்மொழிவுகளைப் பெற்றுக்கொள்வதில் ஆட்சி, நீதி மற்றும் சிவில் பாதுகாப்பு பற்றிய துறைசார் மேற்பார்வைக் குழு கவனம் செலுத்தியுள்ளது.

பாராளுமன்ற உறுப்பினர் நஜித் இந்திக தலைமையில் அண்மையில் பாராளுமன்ற கட்டத்தொகுதியில் நடைபெற்ற இக்குழுவின் கூட்டத்தில், போதைப்பொருள் தொடர்பான குற்றங்களுடன் தொடர்புடைய சந்தேகநபர்களைக் கைது செய்வது முதல் வழக்குத் தாக்கல் செய்வது வரையிலான பொலிஸ் திணைக்களத்தின் நடைமுறைகள் குறித்தும்,இந்நடைமுறைகளைப் பாதிக்கும் நிலவும் சட்டத் தடைகளை நீக்குவது குறித்தும் சிறப்பு கவனம் செலுத்தப்பட்டது.