வரலாற்றில் முதல்முறை: இஸ்ரேல் சுதந்திர தின விழாவில் இந்திய விமானிக்கு அழைப்பு விடுத்துச் சிறப்பித்த பிரதமர் நெதன்யாகு!

சமீபத்தில் டுபாயில் இருந்து இஸ்ரேலின் டெல் அவிவ் நகருக்கு 174 பயணிகளுடன் பறந்த ‘ப்ளைடுபாய்’ விமானத்தில், சக விமானி விமானத்தைக் கீழே மோதி விபத்துக்குள்ளாக்க முயன்ற அதிர்ச்சி சம்பவம் நடந்தது.

காயமடைந்த நிலையிலும், அதீத தைரியத்துடனும், மன உறுதியுடனும் செயல்பட்ட இந்திய கேப்டன் ஸ்மித் மச்சார், பயணிகளின் உதவியோடு சக விமானியைக் கட்டுப்படுத்தி, விமானத்தைச் சவூதி அரேபியாவின் தபூக் விமான நிலையத்தில் பாதுகாப்பாகத் தரையிறக்கினார். இதன்மூலம் 174 பயணிகளின் உயிர்கள் தப்பியது.

மருத்துவமனையில் சிகிச்சையில் இருக்கும் கேப்டன் ஸ்மித் மச்சாரைத் தொலைபேசியில் தொடர்புகொண்டு பேசிய இஸ்ரேல் பிரதமர் பெஞ்சமின் நெதன்யாகு

"நீங்கள் இஸ்ரேலின் கதாநாயகன் மட்டுமல்ல; இந்தியாவுக்கும், உலக முழுமைக்குமான மாபெரும் கதாநாயகன். ஆபத்தான சூழலில் உங்கள் திறமையாலும் சாதுரியத்தாலும் நூற்றுக்கணக்கான உயிர்களைக் காப்பாற்றியுள்ளீர்கள். உங்களுக்கு எனது மனமார்ந்த வாழ்த்துகள்" என்று நெகிழ்ச்சியுடன் கூறினார்.

வழக்கமாக இஸ்ரேல் நாட்டினருக்கு மட்டுமே வழங்கப்படும் உயரிய கௌரவமான இஸ்ரேல் சுதந்திர தின ஜோதி ஏற்றும் நிகழ்வில் , வரலாற்றுச் சிறப்புமிக்க நிகழ்வாகக் கலந்துகொள்ளுமாறு கேப்டன் ஸ்மித் மச்சாருக்கு நெதன்யாகு அழைப்பு விடுத்துள்ளார். மேலும், இந்தியப் பிரதமர் நரேந்திர மோடியையும் இந்த நிகழ்வுக்கு அழைப்பதாகத் தெரிவித்தார்.

விமானியின் இந்த அசாதாரண தைரியமான செயலைத் தொடர்ந்து, சர்வதேச அளவில் அவருக்குப் பாராட்டுகள் குவிந்து வருகின்றன. இந்திய அரசு மற்றும் சவூதி அரேபியா தூதரகமும் அவரது ஆரோக்கிய நிலையைத் தொடர்ந்து கண்காணித்து வருகின்றன.

இந்திய விமானி ஒருவருக்கு இஸ்ரேல் அரசு தன் நாட்டின் மிக உயரிய விழாவில் அளித்துள்ள இந்த கௌரவம், சர்வதேச அளவில் இந்தியாவுக்குக் கிடைத்தப் பெருமையாகப் பார்க்கப்படுகிறது.