AI மூலம் கனடா வங்கிகளில் மோசடி: 4 இந்தியர்கள் உட்பட 7 பேர் கைது!

செயற்கை நுண்ணறிவு (AI) தொழில்நுட்பத்தின் துணையோடு போலியான கடவுச்சீட்டுகள் (Fake Passports) மற்றும் புகைப்படங்களைத் தயாரித்து, கனடாவின் பிரபல வங்கிகளில் ஆன்லைன் மூலம் போலி வங்கிக் கணக்குகளை இந்தக் கும்பல் தொடங்கியுள்ளது.  

கனடாவில் வசிக்கும் தீப் சிங், பர்ஜித் சிங், ஹர்பீத் சிங் மற்றும் குர்லீத் சிங் ஆகிய நான்கு பேரும் ஏ.ஐ. மூலம் போலி ஆவணங்களை உருவாக்கி, பாகிஸ்தானில் உள்ள சுப்ஹான் பட், குல்ரேஸ் பட், முகம்மது நோமான் ஆகியோருக்கு அனுப்பி வைத்துள்ளனர். 

பாகிஸ்தானில் இருந்தவாறே அவர்கள் இந்தத் தகவல்களைப் பயன்படுத்தி கனடா வங்கிகளில் கணக்குகளைத் தொடங்கி கிரெடிட் கார்டுகளைப் பெற்றுள்ளனர்.

பின்னர், அந்த கிரெடிட் கார்டுகள் மூலம் அதிகப்படியான கடன் வரம்பை (Credit Limit) முழுமையாகப் பயன்படுத்திவிட்டு, அந்த அட்டைகளை அப்புறப்படுத்தியுள்ளனர். வங்கிகள் நஷ்டம் குறித்து விசாரணை நடத்திய பின்னரே இந்த மாபெரும் டிஜிட்டல் மோசடி வெளிச்சத்திற்கு வந்துள்ளது.

இதையடுத்து, பாகிஸ்தானில் தீவிர விசாரணை மேற்கொண்டுள்ள புலனாய்வுத் துறையினர், அங்கிருந்த மூவரைக் கைது செய்து அவர்களிடமிருந்து மடிக்கணினிகள் மற்றும் போலி பாஸ்போர்ட்டுகளைப் பறிமுதல் செய்துள்ளனர். 

ஏ.ஐ. தொழில்நுட்பம் மூலம் வங்கிப் பாதுகாப்பு அமைப்புகளை ஏமாற்றி அரங்கேற்றப்பட்டுள்ள இந்தச் சம்பவம் இணையப் பாதுகாப்பு உலகமயமாக விவாதிக்கப்பட்டு வருகிறது.