"அனோஜனை மீட்க அனைத்து வழிகளிலும் நடவடிக்கை": சவூதி பயணத்திற்கு முன் அமைச்சர் விஜித ஹேரத் உறுதி!233

கொழும்பில் நடைபெற்ற விசேட செய்தியாளர் சந்திப்பில் கலந்துகொண்டு கருத்து தெரிவிக்கும்போதே அமைச்சர் இந்த முக்கியமான அறிவிப்பை வெளியிட்டார்.

மரண தண்டனையை எதிர்நோக்கியுள்ள அனோஜனின் நிலையைக் கருத்தில் கொண்டு, அவருக்கு ராஜதந்திர ரீதியிலான அதிகபட்ச உதவிகளை வழங்க இலங்கை அரசாங்கம் தீர்மானித்துள்ளது. இதற்காக மூத்த பாராளுமன்ற உறுப்பினர்கள் மற்றும் தூதரக அதிகாரிகளைக் கொண்ட உயர்நிலை விசேட தூதுக்குழு அமைக்கப்பட்டுள்ளது.

சவூதி அரேபியாவிற்குச் செல்லும் இந்தத் தூதுக்குழு, அங்குள்ள முக்கிய அரச அதிகாரிகள், நீதித்துறைப் பிரதிநிதிகள் மற்றும் தூதரக அதிகாரிகளை நேரில் சந்தித்து, அனோஜனுக்கு விதிக்கப்பட்ட தண்டனையைக் குறைப்பது அல்லது மன்னிப்பு வழங்குவது குறித்து மனிதாபிமான அடிப்படையில் உயர்மட்டப் பேச்சுவார்த்தைகளை நடத்தும்.

அனோஜனை பத்திரமாக மீட்டெடுப்பதற்குத் தேவையான அனைத்து சட்ட மற்றும் ராஜதந்திர நடவடிக்கைகளும் முடுக்கப்பட்டுள்ளதாகத் தெரிவித்த அமைச்சர், அவரது குடும்பத்தினர் எவ்வித அச்சமும் கொள்ளத் தேவையில்லை என்றும் உறுதியளித்தார்.

இலங்கை அரசு மேற்கொண்டு வரும் இந்த தீவிர ராஜதந்திர முயற்சியை அடுத்து, அனோஜன் விவகாரத்தில் நல்லதொரு தீர்வு கிடைக்கும் என்ற எதிர்பார்ப்பு அவரது குடும்பத்தினர் மற்றும் பொதுமக்கள் மத்தியில் அதிகரித்துள்ளது.