பிரித்தானியாவில் நள்ளிரவில் நேர்ந்த கோர விபத்து: இரண்டு காவல்துறை அதிகாரிகள் உட்பட 7 பேர் பரிதாப பலி!

பிரித்தானியாவின் வடகிழக்கு பகுதியில் இடம்பெற்ற மிகக் கொடூரமான வீதி விபத்தில், கடமையில் இருந்த இரண்டு காவல்துறை அதிகாரிகள் உட்பட 7 பேர் பரிதாபமாக உயிரிழந்துள்ளனர். பெரும் சோகத்தை ஏற்படுத்தியுள்ளது.

பிரித்தானியாவின் வடகிழக்கு பகுதியில் உள்ள Middlesbrough அருகே A66 நெடுஞ்சாலையில், அதிகாலை வேளையில் இந்த கோர விபத்து நேர்ந்துள்ளது.

ஐந்து பேருடன் பயணித்த Volkswagen Passat ரக கார் ஒன்று, நெடுஞ்சாலையில் தவறான திசையில் அதிவேகமாக வந்துள்ளது.

அப்போது, சரியான பாதையில் ரோந்துப் பணியில் ஈடுபட்டுக்கொண்டிருந்த காவல் துறையின் வாகனத்தின் மீது அந்த கார் நேருக்கு நேர் பலமாக மோதியது.

இந்த கொடூர மோதலில், ரோந்து வாகனத்தில் இருந்த 37 மற்றும் 38 வயதுடைய இரு காவல்துறை அதிகாரிகளும், எதிரே வந்த காரில் பயணித்த 5 பொதுமக்களும் சம்பவ இடத்திலேயே பரிதாபமாக உயிரிழந்தனர்.

விபத்து நடந்த இடத்திற்கு 14-க்கும் மேற்பட்ட அவசர ஆம்புலன்ஸ் வாகனங்கள் விரைந்தபோதிலும், எவரையும் காப்பாற்ற முடியாமல் போனதாக மீட்புக் குழுவினர் தெரிவித்துள்ளனர். சம்பவம் குறித்து பிரித்தானியாவின் சுயாதீன காவல்துறை நடத்தை அமைப்பு (IOPC) மற்றும் உள்ளூர் காவல்துறையினர் தீவிர விசாரணைகளை மேற்கொண்டு வருகின்றனர்.