"சிறையில் இம்ரான் கான் உயிருக்கு ஆபத்து"பாகிஸ்தான் அரசு மீது மகன்கள் பகிரங்கக் குற்றச்சாட்டு!

சிறையில் அடைக்கப்பட்டுள்ள பாகிஸ்தான் முன்னாள் பிரதமர் இம்ரான் கானின் உடல்நிலை தொடர்ந்து மோசமடைந்து வருவதாகவும், அவர் உயிருடன் திரும்புவது சந்தேகமே என்றும் அவரது மகன்கள் லண்டனில் நடத்திய இணையவழி செய்தியாளர் சந்திப்பில் பகிரங்கமாகக் குற்றம் சாட்டியுள்ளனர்.

பாகிஸ்தானில் ராணுவத்தின் தலையீடு அதிகரித்து நாட்டைக் கடுமையான சர்வாதிகாரப் பாதையை நோக்கி ராணுவத் தளபதி ஆசிம் முனீர் தலைமையிலான அரசு தள்ளிவருவதாக மூத்த மகன் சுலைமான் ஈசா கான் கடுமையாக விமர்சித்துள்ளார்.

மேலும் இம்ரான் கானுக்குத் தனியார் மருத்துவமனையில் உரிய மருத்துவப் பரிசோதனைகள் வழங்கப்பட வேண்டும் என்ற உச்ச நீதிமன்றத்தின் உத்தரவைப் பாகிஸ்தான் அரசு முறையாகச் செயல்படுத்தவில்லை என இளைய மகன் காசிம் கான் குற்றம் சாட்டியுள்ளார்.

மிகச் சிறிய தனிமைச் சிறையில் இயற்கை வெளிச்சம் கூட இல்லாமல் இம்ரான் கான் அடைக்கப்பட்டுள்ளார். இத்தகைய கொடூரமான சூழ்நிலையில் அவர் தொடர்ந்து சிறையில் இருந்தால் அவர் உயிருடன் இருக்க வாய்ப்பில்லை என மகன்கள் வேதனை தெரிவித்துள்ளனர்.

அத்துடன் இம்ரான் கானை சிறையில் வைத்திருக்கும் விதம், திட்டமிடப்பட்ட 'மெதுவான கொலை முயற்சிக்கு' ஒப்பானது என சர்வதேச வழக்கறிஞர் ஜாரெட் கென்சர் சுட்டிக்காட்டியுள்ளார்.

கடந்த 2023-ஆம் ஆண்டு முதல் ராவல்பிண்டி அடியாலா சிறையில் அடைக்கப்பட்டுள்ள 73 வயதான இம்ரான் கானைச் சந்திக்க அவரது மகன்களுக்கு தொடர்ந்து அனுமதி மறுக்கப்பட்டு வருவது குறிப்பிடத்தக்கது.