வங்கிகளில் தங்கம் அடகு வைப்பது அதிகரிப்பு: 5 மாதங்களில் 14,970 கோடி ரூபாய் கடன் பெறப்பட்டுள்ளதாக மத்திய வங்கி தகவல்!

கடந்த டிசம்பர் மாதத்துடன் ஒப்பிடுகையில், இது அடகுக் கடன் மீதியில் 16.12% வளர்ச்சியாகும்.

மே மாத இறுதிய நிலவரப்படி, வணிக வங்கிகளில் தங்க நகைகளை அடகு வைத்துப் பெறப்பட்ட மொத்தக் கடன் மீதி 1,07,900 கோடி ரூபாயை (ரூ. 1.079 டிரில்லியன்) கடந்துள்ளது.

கடந்த ஆண்டின் மே மாதம் முதல் இந்த ஆண்டின் மே மாதம் வரையிலான ஓராண்டு காலத்தில், மக்கள் வணிக வங்கிகளிடம் இருந்து 37,180 கோடி ரூபாய் அடகுக் கடன்களைப் பெற்றுள்ளனர்.

இது அதற்கு முந்தைய ஆண்டின் மே மாதத்துடன் ஒப்பிடுகையில் 52.6% என்ற குறிப்பிடத்தக்க உயர்வாகும்.

உலகச் சந்தையில் தங்கத்தின் விலை அதிவேகமாக உயர்ந்து வருவதைத் தொடர்ந்து, தங்கக் கடன்களுக்கான தேவையும் மிக வேகமாக அதிகரித்து வருகிறது.

இதனால் ஒட்டுமொத்த நிதி அமைப்பிலும் ஏற்படக்கூடிய சாத்தியமான அபாயங்களைக் கட்டுப்படுத்தும் நோக்கில், இலங்கை மத்திய வங்கி நடவடிக்கை எடுத்துள்ளது. இதற்கமைய, அடகு வைக்கப்படும் தங்க நகையின் பெறமானத்தில் அதிகபட்சமாக 70% வரை மட்டுமே கடன் வழங்கப்பட வேண்டும் என கடந்த மே மாதம் மத்திய வங்கி கடன் எல்லையை நிர்ணயித்து உத்தரவிட்டுள்ளது.