பேராதனையில் இருந்து கொழும்பு கோட்டை நோக்கிப் பயணித்த கடுகதி ரயில் தடம் புரண்டு விபத்து - மலைநாட்டு ரயில் சேவை பாதிப்பு!

ரயில் பாதையில் திடீரென ஏற்பட்ட மண்சரிவு மற்றும் கற்கள் விழுந்திருந்தமையினாலேயே இந்த விபத்து சம்பவித்துள்ளதாகத் தெரிவிக்கப்படுகிறது. இதன் காரணமாக மலையகப் பாதையிலான அனைத்து ரயில் சேவைகளும் கடும் தாமதங்களை எதிர்நோக்கியுள்ளன.

'டிட்வா' சூறாவளியினால் பாதிக்கப்பட்டுப் புனரமைக்கப்பட்ட பின்னர், பேராதனையிலிருந்து கொழும்பு கோட்டை நோக்கிப் பயணித்த முதலாவது அலுவலக ரயிலே இவ்வாறு விபத்துக்குள்ளாகியுள்ளதுடன், ரயிலின் முன்பகுதிக்கும் சேதம் ஏற்பட்டுள்ளது.

சம்பவம் குறித்துக் கருத்து தெரிவித்த ரயிலின் சாரதி டீ.ஏ.பி. செந்தநாயக, "பாதையின் குறுக்கே மண்சரிந்து விழுந்திருந்ததை நாங்கள் காணும்போது 10 மீற்றர் தூரம்கூட இருக்கவில்லை. மண் திட்டில் மோதிய வேகத்தில் பாறையொன்றிலும் மோதியே ரயில் சேதமடைந்தது" எனத் தெரிவித்தார்.

தடம்புரண்ட ரயிலை மீட்கும் மற்றும் பாதையை சீரமைக்கும் பணிகள் தீவிரமாக நடைபெற்று வருகின்றன.