அரசுமுறைப் பயணமாக தாய்லாந்து புறப்பட்டார் அமைச்சர் விஜித ஹேரத்!

தாய்லாந்து தொழிலாளர் அமைச்சரின் சிறப்பு அழைப்பின் பேரில் மேற்கொள்ளப்பட்டுள்ள இந்தப் பயணத்தின் போது, இரு நாடுகளுக்கும் இடையிலான இருதரப்பு உறவுகளை மேலும் வலுப்படுத்துவது குறித்து முக்கிய பேச்சுவார்த்தைகள் நடத்தப்படவுள்ளன.

இலங்கைத் தொழிலாளர்களுக்குத் தாய்லாந்தில் வேலைவாய்ப்புகளை வழங்குவது தொடர்பான புரிந்துணர்வு ஒப்பந்தம் (MoU) மற்றும் இருதரப்பு தொழிலாளர் கூட்டுறவு ஒப்பந்தம் ஆகியவை கையெழுத்தாகவுள்ளன. 

தாய்லாந்தின் தொழிலாளர் அமைச்சர், சுற்றுலாத்துறை அமைச்சர் மற்றும் தற்காலிக வெளியுறவுத்துறை அமைச்சர் ஆகியோரை அமைச்சர் விஜித ஹேரத் நேரில் சந்தித்துப் பேசவுள்ளார்.

சுற்றுலா மேம்பாடு, வேலைவாய்ப்பு உருவாக்கல், முறையான குடியேற்றம் மற்றும் பொருளாதாரக் கூட்டுறவு ஆகிய துறைகளில் இரு நாடுகளும் இணைந்து செயல்படுவது குறித்து ஆலோசிக்கப்படவுள்ளது.

இந்த அரசுமுறைப் பயணம் செப்டம்பர் 16 ஆம் தேதி வரை நடைபெறவுள்ளதோடு, இலங்கைக்கும் தாய்லாந்திற்கும் இடையிலான வர்த்தக மற்றும் சமூக உறவுகளை அடுத்த கட்டத்திற்கு எடுத்துச் செல்ல உதவும் என எதிர்பார்க்கப்படுகிறது.