பேரழிவில் நேபாளம்: உயிரிழப்புகள் 469 ஆக அதிகரிப்பு; முடங்கியது போக்குவரத்து!

நேபாளம் மற்றும் திபெத் எல்லைப் பகுதிகளில் ஏற்பட்ட திடீர் வெள்ளப்பெருக்கு மற்றும் நிலச்சரிவு பேரழிவில் பலியானோரின் எண்ணிக்கை 469 ஆக உயர்ந்துள்ளதாக அதிகாரப்பூர்வமாக அறிவிக்கப்பட்டுள்ளது.

நேபாளத்தில் கடந்த சில நாட்களாகப் பெய்து வரும் கனமழை மற்றும் பனிப்பாறைகள் உடைந்ததால் ஏற்பட்ட பெருவெள்ளம் நாட்டின் பல பகுதிகளைச் சூறையாடியுள்ளது. 

நேபாள காவல் துறையின் சமீபத்திய அறிக்கையின்படி, நாட்டின் 8 மாவட்டங்களில் இருந்து இதுவரை 469 உடல்கள் மீட்கப்பட்டுள்ளன. ஆயிரத்திற்கும் மேற்பட்டோர் காயமடைந்தும், காணாமலும் போயுள்ளனர்.  

வெள்ளத்தின் காரணமாக 40 கிலோமீட்டருக்கும் அதிகமான சாலைகளும், பல முக்கிய பாலங்களும் அடித்துச் செல்லப்பட்டுப் போக்குவரத்து முற்றிலும் துண்டிக்கப்பட்டுள்ளது.  

ராணுவப் படையினர், காவல்துறையினர் மற்றும் மீட்புக் குழுவினர் இணைந்து 7,000க்கும் அதிகமான வீரர்கள் மூலம் ஹெலிகாப்டர்கள் மற்றும் மோப்ப நாய்களின் உதவியுடன் தீவிர மீட்ப நடவடிக்கை மேற்கொண்டு வருகின்றனர்.

இமயமலைப் பகுதியில் பயணம் மேற்கொண்ட நூற்றுக்கணக்கான வெளிநாட்டுச் சுற்றுலாப் பயணிகள் பல இடங்களில் சிக்கியுள்ள நிலையில், அவர்களைப் பாதுகாப்பாக மீட்கும் பணிகள் முடுக்கிவிடப்பட்டுள்ளன. 

வெள்ளத்தின் இடிபாடுகளுக்குள் இன்னும் பலர் சிக்கியிருக்கலாம் என அஞ்சப்படுவதால், பலி எண்ணிக்கை மேலும் உயரக்கூடும் என மீட்புக் குழுவினர் கவலை தெரிவித்துள்ளனர்.