இலங்கையில் புதிய மாற்றம்: மின்சார வாகனங்களுக்குப் பச்சை நிற இலக்கத் தகடுகள் அறிமுகம்!

இலங்கையில் உள்ள மின்சார வாகனங்களை எளிதில் அடையாளம் காணும் வகையில், பச்சை நிறப் பின்னணியைக் கொண்ட புதிய இலக்கத் தகடுகளை (Green Number Plates) வழங்க மோட்டார் போக்குவரத்து திணைக்களம் தீர்மானித்துள்ளது.

போக்குவரத்து அமைச்சு வழங்கிய ஆலோசனைகளுக்கு அமைய, நாட்டில் பயன்பாட்டில் உள்ள மற்றும் புதிதாகப் பதிவு செய்யப்படும் அனைத்து மின்சார மோட்டார் வாகனங்களுக்கும் இந்த பச்சை நிற இலக்கத் தகடுகள் வழங்கப்படவுள்ளன. 

இதுவரை சுமார் 8,000 பச்சை நிற இலக்கத் தகடுகள் அச்சிடப்பட்டுள்ளதாக மோட்டார் போக்குவரத்து ஆணையாளர் நாயகம், ஓய்வுபெற்ற எயார் வைஸ் மார்ஷல் துஷார பெர்னாண்டோ தெரிவித்துள்ளார். 

இந்த புதிய பச்சை நிற இலக்கத் தகடுகள் சட்டப்பூர்வமாக செல்லுபடியாகும் எனக் குறிப்பிட்ட ஆணையாளர் நாயகம், இது தொடர்பில் பொலிஸ் நிலையங்களுக்கு அறிவுறுத்துமாறு பொலிஸ் மா அதிபருக்குக் கோரிக்கை விடுக்கப்பட்டுள்ளதாகவும், இதற்கான வர்த்தமானி அறிவித்தல் வெளியிட நடவடிக்கை எடுக்கப்பட்டுள்ளதாகவும் கூறினார்.