புதிய கொள்கை வழிகாட்டல்களால் அச்சுறுத்தல்: கூரை மீது சூரிய மின் உற்பத்தித் துறை வீழ்ச்சியடையும் அபாயம் என எச்சரிக்கை!

இலங்கையின் கூரை மீது சூரிய மின் உற்பத்தித் துறைக்கு ஏற்பட்டுள்ள அச்சுறுத்தல்' எனும் தலைப்பில் அனுப்பப்பட்டுள்ள இந்தக் கடிதத்தில், தேசிய மின்சக்தி பாதுகாப்பு மற்றும் நாட்டின் பொருளாதார மீட்சியைப் பாதிக்கும் இரு முக்கிய கொள்கை ரீதியான பிரச்சினைகளில் ஜனாதிபதி உடனடியாகத் தலையிட வேண்டும் எனக் கோரிக்கை விடுக்கப்பட்டுள்ளது.

இலங்கை பொதுப் பயன்பாடுகள் ஆணைக்குழு (PUCSL) மற்றும் தேசிய அமைப்புகள் இயக்கி (NSO) ஆகிய உத்தியோகபூர்வ அமைப்புகளின் அறிக்கைகளை மேற்கோள்காட்டி, 2027 ஆம் ஆண்டின் முற்பகுதியில் நாட்டில் 450 MWh வரை கடுமையான மின் பற்றாக்குறை ஏற்படும் அபாயம் உள்ளதாக அந்த வர்த்தக சம்மேளனம் எச்சரித்துள்ளது.

வரவிருக்கும் இந்த மின் நெருக்கடியைச் சமாளிப்பதற்கு, கூரை மீது சூரிய மின் உற்பத்தி கட்டமைப்புக்கள் மற்றும் மின்கல சேமிப்பு அமைப்புகளை (RTSPV) விரைவாக விரிவாக்கம் செய்வதே மிகவும் நடைமுறைச் சாத்தியமான ஒரே தீர்வாகும் என அக்கடிதத்தில் கோடிட்டுக் காட்டப்பட்டுள்ளது.

இருப்பினும், அண்மையில் வெளியிடப்பட்ட புதிய கொள்கை வழிகாட்டல்கள், தேசிய மின்சாரக் கட்டமைப்புக்கு ஆதரவளிக்கக்கூடிய இத்துறையின் இருப்பிற்கே பெரும் அச்சுறுத்தலாக அமைந்துள்ளதாகக் கவலை தெரிவிக்கப்பட்டுள்ளது.

தற்போது இயங்கி வரும் கூரை மீது சூரிய மின் உற்பத்தி மற்றும் மின்கல சேமிப்புத் துறையானது தேசிய மின்சாரக் கட்டமைப்புக்கு 2,600 மெகாவாட் மின் கொள்ளளவை வழங்கி வருகிறது. அத்துடன், மின் உற்பத்திக்கு இறக்குமதி செய்யப்படும் புதைபடிவ எரிபொருட்களுக்கான செலவில் மாதமொன்றுக்கு தோராயமாக 20.4 பில்லியன் ரூபாயை இந்தத் துறை நாட்டிற்குச் சேமித்து தருகிறது.

அவ்வாறு நாட்டின் பொருளாதாரத்திற்கும் மின் உற்பத்திக் கட்டமைப்புக்கும் பெரும் பங்களிப்பை வழங்கி வரும் இத்துறை, தற்போது பல ஒழுங்குமுறைத் தடைகளை எதிர்கொண்டு வருவதாகத் தெரிவித்துள்ள தேசிய வர்த்தக சம்மேளனம், இத்துறையைப் பாதுகாத்துத் தேசிய மின் நெருக்கடியைத் தவிர்க்க ஜனாதிபதி உடனடியாக நடவடிக்கை எடுக்க வேண்டும் என வலியுறுத்தியுள்ளது.